Ўзбекистонда хорижий валюта таклифи талабга нисбатан тезроқ ўсмоқда. Бу ҳақда Марказий банк ҳисоботида маълумот берилди.

2026 йил январь-апрель ойларида аҳоли ва корхоналар банклардан 20,4 млрд доллар сотиб олди. Бу 2025 йил мос даврига нисбатан тўрт млрд долларга (24,3 фоизга) кўп.

Жорий йилнинг дастлабки тўрт ойида корхоналар 16 млрд доллар, жисмоний шахслар 4,4 млрд доллар харид қилган.

Ҳисоботда чет эл валютаси сотуви хариддан кўра тезроқ ўсаётгани ойдинлашган. Январь-апрель ойларида аҳоли ва бизнес вакиллари банкларга 18 млрд доллар сотган. Мазкур кўрсаткич 2025 йил мос даврига нисбатан 4,6 млрд долларга ёки 33,9 фоизга ўсган. Шундан аҳоли 8,2 млрд доллар, тадбиркорлар 9,8 млрд доллар хорижий валюталар сотувини амалга оширган.

Марказий банк ҳисоб-китобларига қараганда, тўрт ойлик валюта айирбошлаш курси 11 938 – 12 320 сўм/АҚШ доллари диапазонида тебранган. Ҳисобот даври якунлари бўйича сўм қадри 0,6 фоизга (12 004 сўмдан 11 938 сўмгача) ошган.

“Мазкур даврда алмашув курси тебранувчанлиги ўртача 28,5 сўмни ёки 0,23 фоизни ташкил этди. 2025-йилнинг январь-апрель ойларида мазкур кўрсаткич 13,6 сўм ёки 0,11 фоизга тенг бўлган”, дейилади регулятор шарҳида.

Маълумот учун, 2025-йилда аҳоли 12 млрд доллар сотиб олган (йиллик ўсиш 27 фоиз), жами 9,7 млрд доллар сотганди (ўсиш 45 фоиз). Корхоналарнинг чет эл валютасига бўлган талаби 24 фоизга, таклифи эса 36 фоизга ўсганди.