Ўзбекистон яна олтин сотишни бошлади
Ўзбекистон сўнгги марта ўтган йилнинг сенйтабр ойида 1,47 млрд долларлик олтин сотган эди. 2025 йил якунларига кўра эса қимматбаҳо металлар экспорти мутлақ рекорд ўрнатиб, 9,9 млрд доллардан ошган.
Ўзбекистон халқаро бозорда олтин савдосини қайта тиклади. Статистика агентлигининг ташқи савдо айланмасига доир сўнгги маълумотларига кўра, мамлакат 2025-йилнинг сентябрь ойидан буён биринчи марта олтин экспортини амалга оширди.
2026-йилнинг январь-апрель ойлари якунларига кўра, Ўзбекистоннинг жами экспорти 9,97 млрд долларни ташкил этди. Бу 2025-йилнинг шу даврига нисбатан 16,8 фоизга камдир.
Эътиборли жиҳати, етказиб бериш ҳажмининг учдан бир қисмидан кўпроғи — 3,46 млрд доллари хизматлар кўрсатиш ҳиссасига тўғри келди ва у ҳажм бўйича товар экспортидан сезиларли даражада олдинга ўтиб кетди.
Spot нашри эътибор қаратишича, апрель ойида олти ойлик танаффусдан сўнг қимматбаҳо металл экспорти қайта тикланиши натижасида республика ташқи бозорга қиймати 1,5 млрд доллардан ортиқ олтин етказиб берди. Шунга қарамай, жорий йилнинг дастлабки тўрт ойидаги умумий кўрсаткич 2025-йилнинг январь-апрелидаги ҳажмга ($5,48 млрд) нисбатан деярли тўрт баробар камроқдир. Олтин экспортининг пасайиши фонида савдо балансининг салбий салдоси (дефицит) кескин ўсиб, ўтган йилги 930 млн доллардан 6,38 млрд долларгача етди.
Маълум учун, Ўзбекистон сўнгги марта ўтган йилнинг сенйтабр ойида 1,47 млрд долларлик олтин сотган эди. 2025 йил якунларига кўра эса қимматбаҳо металлар экспорти мутлақ рекорд ўрнатиб, 9,9 млрд доллардан ошган.
Ишлаб чиқариш ва олтин-валюта захиралари
Мамлакатнинг асосий ишлаб чиқарувчиси ҳисобланган Навоий кон-металлургия комбинати январь-март ойларида 737 минг троя унцияси олтин ишлаб чиқарган бўлиб, бу ўтган йилги кўрсаткичдан 2,19 фоизга камдир. Бироқ ишлаб чиқарилган маҳсулотлар қиймати 58,3 фоизга ўсиб, 44 триллион сўмдан ошди.
Экспорт тикланганига қарамай, мамлакатнинг олтин-валюта захиралари ҳам ўсиш тенденциясини намойиш этди. Апрель ойида халқаро захиралар 1,9 млрд долларга кўпайиб, 71 млрд долларга етди.
Марказий банк омборларидаги олтин активлари қиймати 1,22 фоизга кўпайиб, 61,59 млрд долларни ташкил этмоқда. Захирадаги олтиннинг физик ҳажми эса бир оз камайиб, 13,3 млн троя унцияси (тахминан 413,7 тонна) даражасида қайд этилди.
