Ўзбекистон нодавлат театрлар ва театр-студияларни қўллаб-қувватлаш учун ҳар йили 10 миллиард сўм ажратади. Бу ҳақда президентнинг 2 июндаги маданият, санъат ва адабиёт соҳаларини ривожлантириш чора-тадбирлари тўғрисидаги фармонида сўз боради.

Ушбу маблағлар ҳисобидан ҳар йили 50 та саҳна асари яратилиши билан боғлиқ харажатлар, шунингдек, ҳар ойда хусусий бинони ижарага олиш харажатлари бўйича БҲМнинг 50 бараваригача қисми қопланади.

Бунда давлат маданият объектлари уларнинг бўш вақтларида нодавлат театр ва театр-студияларга спектакль намойиш этиш учун ижара тўловисиз фойдаланиш учун берилади.

Томоша заллари учун талабгорлар иккита ёки ундан кўп бўлган тақдирда, улар орасида танлов ўтказилади.

Солиқ имтиёзлари

1 сентябрдан 2036 йил 1 январгача фаолияти концертларни ташкил этиш, кинематография, болалар учун контент яратишдан иборат бўлган компаниялар, нодавлат театрлар ва театр-студиялар, шунингдек, маданият ва санъат соҳасидаги хусусий таълим ташкилотлари солиқ имтиёзларига эга бўлади. Улар қўшилган қиймат солиғи, фойда солиғи, айланмадан олинадиган солиқ, ер солиғи ва мулк солиғидан озод қилинади. Бундай компаниялар ходимлари жисмоний шахслардан олинадиган даромад солиғидан ҳам озод этилади.

Бундан ташқари, хорижий компанияларнинг Ўзбекистон ҳудудида киномаҳсулотлар яратишдан олган даромадлари Ўзбекистон норезидентларининг даромадларига тўлов манбаида солиқ солишда солиқ базасига киритилмайди.

Чипта субсидиялари

1 июлдан бошлаб давлат ва нодавлат театрларга ўзи фаолият юритаётган жойда саҳналаштирилган спектакль учун сотилган ҳар бир чиптага қўшимча 10 минг сўм, бошқа ҳудудга чиққан ҳолда намойиш этилган тақдирда, 20 минг сўм миқдорида субсидия берилади.

Қорақалпоғистон Республикаси ва вилоятларда (Нукус шаҳри ва вилоятлар марказлари бундан мустасно) концерт-томоша тадбири ташкил этилган ва бир тадбир доирасида 1000 тадан ортиқ билет сотилган тақдирда, концерт-томоша ташкилотчиларига сотилган билетлар қийматининг 20 фоизига тенг бўлган миқдорда субсидия берилади.

Театр ваучерлари

1 октябрдан бошлаб давлат бюджети ҳисобидан театр, кино ва концерт тадбирларига бепул ваучерлар берилади.

Уларни ҳар йили 500 минг нафар ўқитувчилар, шифокорлар, давлат хизматчилари, фаол ўқувчи ва талабалар, шунингдек, Ижтимоий реестрга киритилган 100 мингта оиланинг ҳар биридан бир нафардан бола ҳамда ногиронлиги бўлган болалар олишлари мумкин бўлади.

Ваучер қиймати бўйича маблағлар ваучер олувчиларнинг номига очиладиган ижтимоий карта орқали тақдим этилади.