Марказий банк 2 та банк ва 2 та микромолия ташкилотини жаримага тортди
Улар қонунчилик талабларига мувофиқ фаолият юритмаган, шунингдек, инспекция текширувлари ва ўрганишлар давомида камчиликлар аниқланган.
Марказий банкнинг Банк назорати қўмитаси май ойидаги йиғилишларда жами 36 та масалани кўриб чиқиб, тегишли қарорлар қабул қилди. Бу ҳақда регулятор матбуот хизмати хабар берди.
Рўйхатга олиш ва рухсат бериш йўналишида жами 26 та масала муҳокама қилинди. Жумладан:
- кредит ташкилотлари уставига киритилган ўзгартиришларни рўйхатдан ўтказиш — 7 та;
- банкларда аудит ўтказиш ҳуқуқини бериш учун аудиторлик малака сертификатларини тақдим этиш — 2 та;
- микромолия ва факторинг ташкилотларини ҳисоб рўйхатидан ўтказиш — 2 та;
- тўлов ташкилоти фаолиятини амалга ошириш учун лицензияни вақтинча тўхтатиб туриш — 1 та;
- банклар кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш — 14 та.
Қонунчилик талабларига мувофиқ фаолият юритмаганлиги, шунингдек, инспекция текширувлари ва ўрганишлар давомида аниқланган камчиликлар учун 2 та банк ва 2 та микромолия ташкилотига нисбатан жарима санкциялари қўлланилди.
Бундан ташқари, кредит ва тўлов ташкилотларининг молиявий ҳолатига оид 10 та масала кўриб чиқилди. Булар қаторида Марказий банк кўрсатмалари ва пруденциал меъёрлари талабларига риоя этилиши, банк ва нобанк кредит ташкилотларида ўтказилган инспекция текширувлари натижалари муҳокамаси бор.
Шунингдек, тақсимланмаган фойдани тақсимлаш ҳамда ташкилотларнинг молиявий хизматларини «тартибга солиш қумдони» доирасида синовдан ўтказиш масалалари ҳам мажлислар муҳокамасидан ўрин олди.
