Марказий банк август ойидан бошлаб банкоматлар орқали нақд пул ечиб олишдаги носозликлар учун банкларни жаримага тортиши мумкин бўлади. Бу ҳақда Марказий банк раиси Тимур Ишметов Сенатининг 13 июндаги ялпи мажлисида маълум қилди.

Мажлисда Сенатнинг Мудофаа ва хавфсизлик масалалари қўмитаси раиси Қутбиддин Бурхонов 2025-йилда банкоматлар орқали нақд пул ечиб олишда техник носозликлар билан боғлиқ 290 мингта ҳолат аниқланганини, 3 мингдан ортиқ фуқаро шу масала бўйича ички ишлар органларига мурожаат қилганини, улар эса жиноятни олдини олиш ўрнига шу ишлар билан шуғулланишга тўғри келганини қайд этди. Келгусида бундай ҳолатларнинг олдини олиш учун қандай чоралар кўрилаётганини сўради.

Марказий банк раиси банкоматларда нақд пул ечиб олишда шундай муаммолар борлигини тасдиқлади, шу билан бирга 2025-йилда банкоматлар орқали 341 млн операция амалга оширилганини, муаммоли транзаксиялар улуши эса атиги 0,08 фоизни ташкил этганини таъкидлади.

Унинг сўзларига кўра, бундай ҳолатларнинг 85 фоизи банклар фаолияти билан боғлиқ эмас. Уларнинг тахминан 20 фоизи банкоматда керакли номиналдаги купюраларнинг йўқлиги, яна 20 фоизга яқини картанинг блокланиши ёки PIN-коднинг нотўғри киритилиши туфайли содир бўлади. 15 фоиз ҳолатда алоқа йўқлиги, яна 10 фоиз ҳолатда эса электр таъминотидаги узилишлар сабаб бўлади. Бевосита банклар ва тўлов тизимлари операторларига 46 мингга яқин ҳолат (15 фоиз) тўғри келади.

Тимур Ишметов Марказий банк банкоматлардаги ҳар бир операцияни назорат қила олмаслигини, шу билан бирга, истеъмолчилар ҳуқуқларини ҳимоя қилишни кучайтириш ва банкларнинг мижозларга хизмат кўрсатиш сифати учун масъулиятини ошириш ниятида эканини билдирди.

15 майда Марказий банк тижорат банкларига, тўлов тизимлари операторларига, тўлов ташкилотларига банкоматлар билан боғлиқ муаммоларни тезкор ҳал қилиш бўйича қатор кўрсатмалар берганди.

Тимур Ишметов бу борада Марказий банк бир қатор меъёрий ҳужжатларни ҳам тайёрлаганини, улардан биринчиси 6 августдан кучга киришини, банкоматлардан фойдаланишда мижозларга хизмат кўрсатиш билан боғлиқ қоидабузарликлар учун банкларга молиявий жарималар қўллаш бошланишини маълум қилди.

Шунингдек, банкларни шу фуқароларнинг мурожаатлари билан ишлаш бўйича индекс ишлаб чиқилганини, унинг асосида энг ёмон кўрсаткичга эга бўлган банкларни эълон қилиш бошланишини билдирди.