Ўзбекистонда фуқаролар мурожаатлари билан ишлаш бўйича энг ёмон банклар эълон қилина бошланади. Бу ҳақда 13 июнь куни Олий Мажлис Сенатининг ялпи мажлисида Марказий банк бошқаруви раиси Тимур Ишметов маълум қилди.

Мажлисда Сенат Марказий банкнинг 2025 йилдаги фаолияти тўғрисидаги ҳисоботини эшитди. Регулятор раиси аҳоли билан ишлашишда ёмон кўрсаткичга эга банклар рўйхати шакллантирилишини қайд этди

«Биз биринчи марта банкларнинг фуқаролар мурожаатлари билан ишлаш бўйича индексини ишлаб чиқдик. Худо хоҳласа, кейинги ҳафтада, мурожаатлар билан ишлаш бўйича энг ёмон кўрсаткичи бўлган банкларни эълон қилишни бошлаймиз», — деди у.

Бир ойдан сўнг Марказий банк ўзининг ижтимоий тармоқлардаги саҳифаларида фуқароларнинг банк хизматлари бўйича мурожаатлари учун иккита канални ишга туширади, шунингдек, тўғридан-тўғри мурожаатларни қабул қилиш механизмини жорий этади. Бунда банклар бир соат ичида жавоб беради ва масалаларни ҳал қилади.

Ишметов Марказий банкнинг ўзида ҳам муаммолар борлигини тан олди. Унинг сўзларига кўра, ўтган ойда Cалл-марказ янгиланиб, алоқа марказига айлантирилган ва ҳозирда тест режимида ишламоқда.

Натижада мурожаатлар сони тахминан олти бараварга ошди — илгари фуқаролар кўпинча Марказий банкка қўнғироқ қила олмас эдилар, шу сабабли мурожаатлар етарли даражада қабул қилинмасди. Регулятор бу бўйича маълумотларни бир-икки ой ичида алоҳида эълон қилиш ва алоқа маркази фаолиятини кенгайтиришни режалаштирмоқда.

«Умуман, биз банкларнинг истеъмолчилар билан ишлаш, уларнинг ҳуқуқларини ҳимоя қилиш борасидаги кенг қамровли ишларни бошладик. Бу йилдан, насиб қилса, кескин ижобий ўзгаришларни кузатамиз», — дея хулоса қилди Тимур Ишметов.