2026 йил 1 июлдан бошлаб мажбурий рақамли маркировка жорий этилган товарларни электрон ҳисобварақ-фактуралар ва онлайн назорат-касса техникаси орқали реализация қилишда қўшимча талаблар жорий этилади.

Электрон ҳисобварақ-фактураларда қуйидаги маълумотлар автоматик тарзда текширилади:

• товар етказиб берувчида тегишли лицензия, рухсатнома ёки хабардор қилиш ҳужжати мавжудлиги;
• субъектнинг «Асл белгиси» MAT’да рўйхатдан ўтганлиги;
• рақамли маркировка кодларининг тўғри акс эттирилганлиги;
• товарни харид қилувчи чакана савдо субъектининг рақамли маркировка кодларини ўқувчи махсус қурилмалар билан жиҳозланганлиги.

Тадбиркорларга 2D-сканерлар харид қилишда солиқ имтиёзлари тақдим этилади.

Онлайн назорат-касса техникаси чекларида эса:

• рақамли маркировка коди «Асл белгиси» MAT’да мавжудлиги;
• маҳсулотнинг MXIK коди рақамли маркировка кодига мувофиқлиги автоматик тарзда текширилади.

Мазкур ўзгаришлар товарлар ҳаракатининг шаффофлигини таъминлаш, ноқонуний айланманинг олдини олиш, рақамли маркировка маълумотларининг ишончлилигини ошириш ҳамда тадбиркорлик субъектлари учун ҳисобга олиш ва назорат жараёнларини соддалаштиришга хизмат қилади.

Эслатиб ўтамиз, рақамли маркировка масалалари бўйича тезкор амалий кўмак олиш учун солиқ тўловчининг шахсий кабинетидаги «Рақамли маркировка билан ишлаш» хизмати орқали Рақамли маркировка қоидаларига риоя этилишини назорат қилиш бўйича ҳудудлараро солиқ инспекциясига тўғридан-тўғри савол билан мурожаат қилиш мумкин.

Келиб тушган саволлар қисқа муддатларда кўриб чиқилади ҳамда солиқ тўловчиларга тегишли тушунтириш ва амалий ёрдам кўрсатилади.