Солиқ қўмитаси матбуот хизмати тадбиркорларнинг қўшилган қиймат солиғини тўлашга ўтиши учун белгиланган чегаранинг оширилиши юзасидан изоҳ берди.

БҲМнинг 12 минг баравари (4,944 млрд сўм) миқдоридаги янги чегара президентнинг 26 майдаги кичик бизнес учун қулай шарт-шароитлар яратиш тўғрисидаги фармони билан жорий этилди. Қарор жорий йилнинг 1 июнидан ўзгартиришлар кучга киргунга қадар ва ундан кейин ҚҚС тўлашга ўтиш учун тушум чегарасини белгилаш тартиби борасида саволларни юзага келтирди.

Солиқ қўмитасида таъкидланишича, январь май ойларида айланмаси 1 млрд сўмдан ошган компаниялар ҚҚС тўлашга эски тартиб бўйича ўтади. Июнь ойидан бошлаб эса унга айланма фақат 4,944 млрд сўмлик янги чегарадан ошгандагина ўтиш мумкин.

Шунингдек, идора ўзини ўзи банд қилган фуқаролар учун ўзгаришларнинг қандай амал қилишини тушунтирди. Солиқ қўмитасининг қайд этишича, ҚҚСга ўтишнинг янги чегараси уларга ҳам аввалгиси каби қўлланади.

Умумбелгиланган солиқ режимига ўтиш чегарасининг оширилиши 26 май куни президент ҳузурида ўтказилган тақдимот якунида эълон қилинди. Унда Шавкат Мирзиёев кичик бизнеснинг ўсиши учун янада қулай иқтисодий шароитлар ва тартибга солиш муҳитини яратиш чора-тадбирларини кўриб чиққан эди.

Тақдимотда таъкидланганидек, 2019 йилда 1 млрд сўмлик лимит белгилангандан буён нархлар сезиларли даражада ошди. Натижада айрим тадбиркорлар бу чегарага яқинлашганда айланмани яшириш, чек бермаслик ёки бизнесни бўлишга ўтаётган эди.

«Бу масала анчадан буён тадбиркорлар учун оғриқли бўлиб келаётган эди. Ҳудудларга сафарлар чоғида улар ҚҚС тўлашга ўтиш бўйича 1 млрд сўмлик чегара жуда пастлиги, солиқ маъмуриятчилиги мураккаблиги, текширув ва ҳисоботлар эса ҳаддан ташқари кўплигини таъкидлаб келишарди. Натижада бизнес хотиржам ривожланиш ўрнига сунъий равишда бўлинишга мажбур бўлаётган эди», — деди Президент администрацияси раҳбари Саида Мирзиёева.

Йиғилишда кичик бизнес учун шароитларни яхшилашга қаратилган бошқа таклифлар ҳам билдирилди. Умумий овқатланиш ва хизмат кўрсатиш соҳаси учун 6% ставкада ҚҚС тўлаш, ресторан ва меҳмонхоналарга алкоголь ва тамаки маҳсулотларини нақд пулга сотишга рухсат бериш ҳамда солиқ маъмуриятчилигини соддалаштириш шулар жумласидандир.

Спот солиқ маслаҳатчиси Умидбек Сафаров билан солиқ тизимидаги ушбу ўзгаришлар борасида суҳбатлашиб, тадбиркорлар нималарга тайёр бўлиши, энди нима қилишлари кераклигини кўриб чиқди.