Солиқ қўмитаси банклар томонидан юридик ва жисмоний шахсларнинг ҳисобварақлари ёки омонатларига оид ахборотларни солиқ органларига тақдим этиш тартиби тўғрисидаги Вазирлар Маҳкамасининг қарори лойиҳасини жамоатчилик муҳокамасига қўйди.

Лойиҳага кўра, банкларга юридик ва жисмоний шахсларнинг ҳисобварақлари тўғрисидаги маълумотларни солиқ органларига электрон шаклда маълум қилиш, шунингдек, солиқ назоратини амалга ошириш учун солиқ органларининг сўровига кўра ахборот тақдим этиш таклиф этилмоқда.

Асосий таклифлардан бири — жисмоний шахсларнинг банк карталарига бошқа фуқароларнинг (яқин қариндошлар бундан мустасно) карталари ёки электрон ҳамёнларидан бир ой давомида катта миқдорда пул келиб тушиши ҳолатлари юзасидан маълумот алмашишдир.

Бунда, агар бундай тушумларнинг умумий суммаси календарь ойида базавий ҳисоблаш миқдорининг 500 бараварига тенг ёки ундан ошса, банклар бу ҳақда солиқ органларига маълумот тақдим этиши керак бўлади. Ҳозирда 500 БҲМ 206 млн сўмни ташкил этади, 2026 йил 1 сентябрдан эса бу миқдор 220 млн сўмга етади.

Шунингдек, жисмоний шахслар томонидан чет элдаги юридик шахсларга амалга оширилган пул ўтказмалари бўйича ҳам маълумотлар тақдим этилиши назарда тутилган. Бунда фуқароларнинг шахсий маълумотлари кўрсатилмайди.

Агар ҳужжат қабул қилинса, Солиқ қўмитаси ва Марказий банк икки ой ичида автоматлаштирилган Банк-солиқ ахборот алмашиш модулини ишлаб чиқиши кўзда тутилган. Шунингдек, тўрт ой муддатда банкларнинг ахборот тизимлари ушбу платформага интеграция қилиниши режалаштирилмоқда.