Миллиардерлар нима ўқийди? Уоррен Баффетдан 5 та китоб тавсия
Билл Гейтс Баффетдан бизнесга оид яхши бир китоб тавсия қилишини сўраган.
Уоррен Баффет дунёнинг энг бой инсонлари рўйхатида 8-ўринда туради. Айни вақтда унинг молиявий ҳолати 111 миллиард долларга баҳоланмоқда. Бизнесмен бўш вақтининг 80 фоизини китобхонликка бағишлайди. Қуйида у тавсия қилган китоблар ҳақида сўз боради.
«Ақлли инвестор: сармояларни баҳолаш бўйича тўлиқ қўлланма», Бенжамин Грэм
Ушбу ишбилармонлик адабиёти биринчи марта 1949 йилда нашр этилганига қарамай, ҳанузгача турли даражадаги инвесторлар орасида машҳурдир. Баффет учун бу китоб кўп миллиард долларлик бойликка эришиш йўлидаги биринчи қадам эди. Миллиардер китобнинг асосий устунлиги сифатида бозор ишлайдиган тамойилларнинг аниқ тақдимотини кўради.
«Бизнес саргузаштлари. Уолл-стритнинг 12 та классик ҳикояси», Жон Брукс
Ушбу китобни бир вақтнинг ўзида иккита миллиардер тавсия қилади: Билл Гейтс ва Уоррен Баффет. Қизиғи, Билл ушбу китоб ҳақида Уоррендан эшитган. Бир куни у Уоррен Баффетдан бизнесга оид яхши бир китоб тавсия қилишини сўраган.
Китоб қирқ йил олдинги корпоратив Америка тарихига асосланган. Классик ҳикояларда Брукс бозорнинг ўзгарувчанлиги, молиячилар ва инвесторларнинг тушунчалари, бизнесни бошқариш тамойиллари ва компаниялар инқирозли вазиятларда ва энг муҳими, парвоз пайтида қандай ҳаракат қилиши кераклиги ҳақида сўзлаб беради.
«Инвесторлар чайқовчиларга қарши. Ким ҳақиқатан ҳам фонд бозорини бошқаради», Жон Богл
Кенг омма учун мавжуд бўлган биринчи инвестиция фонди — Vanguard 500 асосчиси Жон Боглнинг сўзларига кўра, замонавий инвестиция муҳити чайқовчилик бозорига айланди. Ушбу китоб ўзининг даъволари тўғрилигини кўрсатишга ва узоқ муддатли инвестиция нима учун ҳали ҳам тажовузкор чайқовчиликдан устун эканлигини тушунтиришга уринади.
2012 йилда Баффет ушбу китобни Berkshire Hathaway акциядорларига тавсия этилган рўйхатга киритди.
«Энг яхши бош директорлар қоидалари», Уильям Торндайк
Китобнинг асосини компанияни бошқаришда радикал ёндашувни афзал кўрган саккиз нафар бош директорнинг муваффақият ҳикоялари ташкил этади. Баффет Уильям Торндайкнинг асарини бош директорлар ҳақидаги ажойиб китоб деб билади.
Муваффақиятли ҳикоялардан бири Cap Cities / ABC медия компанияси бош директори Том Мерфи ҳақида бўлиб, Баффет Мерфини энг яхши бизнес менежери деб билади.
«1000 доллар топишнинг минг йўли», Фрэнсис Минакер
Минакернинг иши Баффетни сармоя киритиш ва бизнесни бошлашга илҳомлантирган биринчи китобдир. У ушбу китобни етти ёшлигида туғилиб ўсган шаҳри Омаха кутубхонасидан топган. Бўлажак миллиардер китобни ўқигач ўз ҳаётини нимага бағишламоқчи эканлигини англаб етган.
Минакер китобидаги бизнес қоидалари ва самарали бизнес моделлари китоб нашр этилганидан 80 йил ўтгач ҳам долзарблигича қолмоқда.
Аввалроқ Netflix асосчиси Рид Хастингс тавсия қилган китоблар ҳақида батафсил маълумот берилганди.