Россиялик миллиардер Роман Абрамовичнинг Millhouse компанияси таркибига кирувчи «Финэстейт Ко» МЖЧ «Отель-пансионат Кристалл» компаниясининг ягона акционерига айланди. Бу ҳақда РБК хабар берди.
Қайд этилишича, «Отель-пансионат Кристалл» компанияси худди шу ном остидаги меҳмонага эгалик қилади. Кўчмас мулк Россиянинг Геленжик шаҳрида, Қора денгиз яқинида жойлашган.
Илгари «Отель-пансионат Кристалл» меҳмонхонаси паритет асосида Геленжикнинг собиқ мэри ва Давлат Думасининг собиқ депутати Сергей Озеров ва Валерий Сергеевич Озеровга тегишли эди. Сергей Озеров 1998 йилдан 2007 йилгача шаҳарни бошқарган. У 2007 йил декабрь ойида Давлат Думасига сайланганида мэр лавозимини тарк этган.
Маълум қилинишича, ушбу меҳмонхона Абрамовичнинг Геленжикдаги иккинчи кўчмас мулкидир. 2021 йил декабрь ойида Millhouse Геленжик кўрфазининг қарама-қарши қирғоғидаги ташландиқ «Спартак» стадиони ҳудудини сотиб олганди.
Маълумот учун, Абрамовичнинг бойлиги Forbes маълумотларига кўра, 12,8 миллиард долларга баҳоланган. У молиявий ҳолати бўйича дунёда 163-ўринда, Россияда эса 12-ўринда бормоқда. Қайд этиш керакки, миллиардер Англиянинг «Челси» футбол клубига ҳам эгалик қилади.
