Жефф Безоснинг Blue Origin компанияси космик туризмга бўлган талабни қондириш учун кўпроқ ракеталар ишлаб чиқаради. Бу ҳақда CNBC хабар берди.

Маълум қилинишича, Жефф Безоснинг Blue Origin компанияси 2021 йилда учта экипажли миссия ва битта юк ташувчи қидирув парвозини амалга оширган, аммо компания бош директори Боб Смит 2022 йилда бу рақамни осонлик билан икки баравар ошириши мумкинлигига ишончи комил.

Смитнинг сўзларига кўра, компания космик туризм бозоридаги барқарор талабни қондириш учун кўпроқ New Shepard ракеталарини қуриши керак.

«Менимча, ҳозирда Blue Origin учун муаммо шундаки, биз ҳақиқатан ҳам таъминотда чекланганмиз», деган у FAA’нинг Вашингтондаги тижорат космик транспорти конференциясида сўзлаган нутқида.

New Shepard Техасдаги чўлда жойлашган Blue Origin хусусий объектидан учирилади, у 100 километрдан ошиқ баландликка етади (АҚШда 80 километр ер атмосфераси ва космос ўртасидаги чегара ҳисобланади). Blue Origin компанияси энди иккита New Shepard ракета кучайтиргичига эга, улардан бири юк ташиш учун, иккинчиси йўловчи рейслари учун.

Компания рейслардаги жойлар нархини ошкор этмаган. Blue Origin нархлари тузилишининг ягона далили бу биринчи рейсдаги ўриндиқ учун 28 миллион долларлик аукциондир. Безос аввалроқ компания деярли 100 миллион долларлик чипталар сотганини айтган, Смит эса февраль ойи ўрталарида аукционларда минглаб одамлар иштирок этганини айтган.

«Биз New Shepard’нинг янги рейсларига жуда катта талаб борлигини кўрмоқдамиз», — деган Смит.

Аввалроқ Нидерландиядаги тарихий кўприк Жефф Безоснинг супер яхтаси сузиб ўтиши учун демонтаж қилиниши ҳақида хабар берилганди. Шунингдек, Жефф Безос қаришнинг олдини олувчи стартапга 3 миллиард доллар сармоя киритиши хабар қилинди.