Жаҳон банки (ЖБ) март ойи охиригача «ислоҳотларни қўллаб-қувватлаш» учун Киевга 350 миллион доллар ажратиш масаласини кўриб чиқади.Бу ҳақда Жаҳон банки президенти Дэвид Мэлпас Украина Президенти Владимир Зеленский билан Мюнхен хавфсизлик конференцияси доирасидаги учрашувда маълум қилди.

Мэлпаснинг таъкидлашича, кейинги молиявий ёрдамни ажратиш қўшимча ислоҳотлар, жумладан, энергетика ва иқлим соҳаларида ҳам амалга оширилади.

«Президент Мэлпас Жаҳон банки давом этаётган ислоҳотларни қўллаб-қувватлаш учун Украинага 350 миллион долларгача маблағ ажратиш масаласини март ойи охиригача кенгашда кўриб чиқишга тайёрланаётганини тасдиқлади», дейилади хабарда.

Мэлпас ва Зеленский, шунингдек, Жаҳон банки томонидан Украина учун энергия самарадорлиги, инфратузилма, темир йўллар ва иқтисодиётни мустаҳкамлаш соҳаларида режалаштирилган бир қатор лойиҳаларни муҳокама қилди.

Бундан ташқари, учрашувда Украинанинг жорий инқироз туфайли молиявий харажатларининг ошиши ва энергия нархининг ошиши кўриб чиқилди.