Украинадан эвакуация қилинган Ўзбекистон фуқароларини олиб чиқиш учун Тошкентдан Польшага иккинчи махсус самолёт жўнаб кетди. Бу ҳақда «Дунё» ахборот агентлиги хабар берди.
Қайд этилишича, айни пайтда «Катовице» (Польша) аэропортида Тошкентдан учган Uzbekistan Airways АЖнинг биринчи бортига 241 нафар Ўзбекистон фуқароси жойлашмоқда.
28 Февраль куни Тошкентдан учган иккинчи самолёт маҳаллий вақт билан соат 17:00 (Тошкентда 21:00) атрофида Польшага етиб бориши кутилмоқда.
Аввалроқ Украинадаги ўзбекистонликларни эвакуация қилиш учун Тошкентдан Польшага биринчи махсус самолёт жўнаб кетгани хабар қилинганди.
Ўзбекистоннинг Киевдаги элчихонасидан олинган маълумотга кўра, Украинанинг Краковец назорат пункти орқали ўзбекистонликларни ўтказишни тезлаштириш мақсадида 7 та автобус ижарага олинган. Улар кўмагида шу пайтгача Украина-Польша чегарасига 11 марта қатнов амалга оширилган.
Айни пайтга қадар 560 нафардан кўпроқ фуқаро Польша давлат чегарасини кесиб ўтган.
