Америкалик 19 ёшли Жек Суини Россиядаги энг бой одамларнинг парвозларини кузатиб борувчи Russian Oligarch Jets аккаунтини яратди. Бу ҳақда Bloomberg хабар бермоқда.

Аккаунт вертолётлар ва хусусий самолётлардан тортиб тижорат самолётларигача бўлган турли хил ҳаво кемаларини кузатиб боради. Аккаунт кузатиб борадиган одамлар рўйхатига Владимир Потанин, Роман Абрамович, Александр Абрамов, Олег Дерипаска, Михаил Прохоров, Алишер Усмонов, Вагит Алекперов, Виктор Вексельберг ва ҳатто «Норникель» самолётлари киради.

Жек Суини Илон Маск самолётининг парвозларини кузатувчи аккаунт яратиш орқали интернетда машҳурликка эришганди. Кейинчалик SpaceX ва Tesla бундан хабар топиб, йигитга 5 минг доллар эвазига аккаунтни ўчириб ташлашни таклиф қилди.

Аммо Суини пул миқдорини оширишга қарор қилди ва бунинг эвазига 50 минг доллар ёки Маскнинг компанияларидан бирида амалиёт ўташ имкониятини талаб қилди. Тадбиркор беадабликларга чидай олмади ва йигитнинг ҳисобларини тўсиб қўйди.

Февраль ойи бошида Суини ўзининг @ElonJet каналини монетизация қилиш учун Ground Control лойиҳасини яратганини эълон қилди ва SpaceX раҳбарининг тасвири туширилган товар сотишни бошлади.

Аввалроқ Миллиардер Олег Тиньков Россиянинг Украинага босқинини қоралагани хабар қилинганди. Шунингдек, Роман Абрамович Россия ва Украина ўртасидаги музокараларда ёрдам бераётгани ҳақида хабар берилди.