Миллиардер Олег Тиньков Россиянинг Украинага босқинини қоралади. Бу ҳақда у Instagram’даги постида маълум қилди.

«Мен ўзим, деярли икки марта ҳаётнинг нариги томонида бўлганимда, сўнгги 2 йил ичида унинг қанчалик нозик эканига амин бўлдим! Ва у биз эга бўлган ягона нарса! Ҳозир Украинада ҳар куни бегуноҳ одамлар ўлмоқда, буни ақлга сиғдириб ва қабул қилиб бўлмайди!», — деб ёзган Тиньков.

Унинг таъкидлашича, давлатлар пулни ҳарбий ҳаракатларга эмас, балки одамларни даволаш ва илмий тадқиқотларга сарфлашлари керак. Тиньков постига ўз оиласи билан тушган суратини жойлаган.

Миллиардернинг қўшимча қилишича, Тиньковлар оиласи фонди қон саратони билан касалланган одамларнинг ҳаётини сақлаб қолиш билан шуғулланади: у асбоб-ускуналар сотиб олади, тиббиёт ходимларини ўқитади ва трансплантация марказларини қуришга ёрдам беради.

Миллиардернинг ўзи оққондан азият чеккан: 2020 йил июль ойида у суяк илиги трансплантациясидан ўтказилди. 2021 йил декабрь ойида у ўз аҳволини «қандайдир кураш босқичи» деб баҳолади ва «у курашаётган [касалликни] мағлуб эта олмаганини» тан олди.

Олег Тиньков — Россиянинг Украинадаги ҳарбий амалиёти бўйича ўз позициясини билдирган биринчи россиялик миллиардерлардан бири. «Альфа-групп» кузатув кенгаши раиси Михаил Фридман бир кун аввал Forbes нашрига Украинада бўлаётган воқеаларни баҳолаб, ҳамкасбларига мактуб ёзганини тасдиқлади.

Мактуб мазмуни ҳақида Financial Times ёзди. Фридман ўз баёнотини чоп этиш ниятида эмаслигини таъкидлади. FT хабарига кўра, у Украинада содир бўлаётган воқеаларни «фожиа» деб атаган ва қон тўкилишини тўхтатишга чақирган, ота-онаси ҳамон Украинада яшаши ва у «украинлар ва русларга қаттиқ боғланганини» таъкидлаган.

Аввалроқ Роман Абрамович Россия ва Украина ўртасидаги музокараларда ёрдам бераётгани хабар қилинганди. Шунингдек, Европа Иттифоқи Россиянинг энг бой миллиардерларига қарши санкция жорий қилиши мумкинлиги ҳақида хабар берилди.