Credit Suisse инвесторлардан ўзининг бой мижозларига тегишли яхталари ва шахсий самолётларига оид ҳужжатларни йўқ қилишни сўради. Бу ҳақда Financial Times банкдан шундай хат олган компанияларда ишлайдиган манбаларга таяниб ёзмоқда.

Credit Suisse’дан мактублар АҚШ, Буюк Британия ва Европа Иттифоқи Россиянинг Украинадаги «махсус операцияси»га жавобан унга қарши санкциялар жорий қила бошлаган ҳафта давомида юборилди. Уларда банк «самолётлар, яхталар, кўчмас мулк ва молиявий активлар» гарови остидаги кредитларни секюритизация қилиш билан боғлиқ ҳужжатларни йўқ қилишни сўраган.

Банк, шунингдек, «сўнгги пайтларда оммавий ахборот воситаларида сизиб чиққан маълумотлар»га асосланиб, Credit Suisse’га битим давомида илгари берилган махфий маълумотларни ўчириб ташлашни сўраган. Улар илгари чоп этилган FT материалларига ишора қилмоқда, деб ёзади газета.

Хусусан, материалларда айтилишича, 2017 ва 2018 йилларда яхталар ҳамда самолётлар учун кредитлар бўйича дефолтларнинг учдан бир қисми «АҚШнинг россиялик олигархларга қарши санкциялари билан боғлиқ». Ўша пайтда FT Олег Дерипаска ҳамда ака-ука Аркадий ва Борис Ротенберглар банк билан хусусий самолётлар ижараси шартномаларини бекор қилишлари кераклиги ҳақида ёзган эди.

Credit Suisse бу бўйича изоҳ беришдан бош тортди.

Аввалроқ Credit Suisse мижозларининг маълумотлари интернетга сиздирилгани маълум қилинганди. Шунингдек, Илон Маскнинг самолётини таъқиб қилган ўсмир россиялик миллиардерларни кузатишга ўтгани ҳақида хабар берилди.