Санкцияларга учраган россиялик миллиардер Роман Абрамовичдан «Челси» футбол клубини сотиб олиш учун 20 дан ортиқ талабгор қизиқиш билдирди. Бу ҳақда Bloomberg хабар берди.
Маълумотларга кўра, таклифларни тақдим этиш муддати 18 март, жума куни тугайди. Уолл-Стрит инвесторлари, Саудия Арабистони ва Буюк Британиянинг миллиардерлари ва ҳатто MMA курашчиси Конор Макгрегор клубни сотиб олишга тайёрлигини маълум қилди.
Американинг Oaktree Capital Management компанияси ҳам келишув бўйича музокаралар олиб боришни кўриб чиқмоқда ёки унда кенгроқ инвесторлар консорциуми таркибида иштирок этиши мумкин. Шу ҳафта бошида Citadel ҳеж-фонди асосчиси миллиардер Кен Гриффин «Челси»ни сотиб олишга тайёрлигини маълум қилди ва шу мақсадда «Чикаго Кабс» бейсбол клуби эгалари — Риккетс оиласи билан инвестиция гуруҳини тузди.
Британиялик кўчмас мулк магнати Ник Кэнди ўзининг таклифини амалга ошириш учун потенциал шериклар билан музокаралар олиб борганини ва ҳатто «Челси» собиқ мураббийи Жанлука Виалли билан ҳамкорлик қилаётганини айтди. Илгари British American Tobacco компанияси ва ҳозирда British Airways бош компаниясида ишлаган тадбиркор Мартин Бротон ҳам ўзини номзод қилиб кўрсатиш режасини эълон қилди. 2010 йилда Бротон қисқа вақт ичида «Ливерпул» директорлар кенгаши раиси бўлган.
Форс кўрфази давлатларида трансляция ҳуқуқи ва реклама бизнеси билан шуғулланувчи Саудиянинг Saudi Media Group компанияси ҳам жамоани сотиб олиш учун ариза топширди. «Челси»нинг потенциал харидорлари сони шунчалик тез ўсдики, ҳатто ММА жангчиси Конор Макгрегор клубни 3 миллиард фунт стерлингга сотиб олишга тайёрлигини эълон қилди, аммо таҳлилчилар унинг ниятлари жиддийлигига шубҳа қилмоқда.
Қайд этилшича, келажакда битим миқдори 2,5–3,5 миллиард доллар оралиғида бўлади. Шу билан бирга, аввалроқ Reuters манбалари Абрамович «Челси»ни 4 миллиард долларга сотишни кутаётганини иддао қилганди.
Аввалроқ Европа Иттифоқи Роман Абрамович ва «Яндекс» раҳбарига янги санкциялар киритгани хабар қилинганди. Шунингдек, Португалия санкцияларга учраган Абрамович бўйича яна бир муносабат билдиргани ҳақида хабар берилди.
