Европа Иттифоқи Роман Абрамович ва «Яндекс» раҳбарига янги санкциялар киритди
Тўртинчи санкциялар пакети 15 нафар тадбиркор ва давлат ОАВ раҳбарларига тааллуқлидир.
Европа Иттифоқи Роман Абрамович ва «Яндекс» раҳбарига янги санкциялар киритди. Бу бўйича ҳужжат ЕИ расмий сайтида эълон қилинди.
Европа Иттифоқи Россияга қарши тўртинчи санкциялар пакетини эълон қилди. Миллиардер Роман Абрамович, «Яндекс» бош директори Тигран Худавердян, Магнитогорск металлургия заводининг (ММК) асосий акциядори, миллиардер Виктор Рашников, шунингдек, энергетика ва тоғ-кон саноати компаниялари раҳбарлари ҳамда ОАВ вакиллари янги чекловлар остида қолди.
Шунингдек, доғистонлик сенатор ва миллиардер Сулаймон Керимов, «Первий канал» бош директори Константин Эрнст, Россия саноатчилар ва тадбиркорлар иттифоқи (РСПП) раҳбари Александр Шохин, миллиардер Герман Хан ҳам санкцияга тортилди.
Бундан ташқари, Россия банкларининг рейтинглари ва Россия энергетика соҳасига инвестициялар, Россия қора металлургия маҳсулотларини Европа Иттифоқига импорти ва Россияга ҳашаматли товарлар экспортига тақиқ қўйилди.
Маълумотларга кўра, санкциялар 15 нафар тадбиркор ва давлат ОАВ раҳбарларига тааллуқлидир. Роман Абрамович Россия Президенти Владимир Путин билан алоқалари, шунингдек, бизнеси Россия бюджети учун муҳим даромад манбаси бўлгани учун «олигархлар» орасида шахсий санкциялар остида қолган.
Аввалроқ Тигран Худавердян «Яндекс» компаниясининг Россиядаги янги бош директори бўлгани хабар қилинганди. Шунингдек, Дмитрий Песков Россия Ғарб санкцияларидан ўз манфаати учун фойдаланишга ҳаракат қилаётганини айтгани ҳақида хабар берилди.