Россия Президенти Владимир Путин шахсан Роман Абрамовичнинг Россия-Украина тинчлик музокараларида иштирок этишини маъқуллади. Бу ҳақда мавзу бўйича бевосита маълумотга эга бўлган икки манбага таяниб Financial Times хабар берди.
Маълум қилинишича, миллиардер музокаралар жараёнини тартибга солишга ёрдам бериш учун Украина Президенти Владимир Зеленский идорасининг юқори мартабали амалдори билан учрашган.
Россия Президенти матбуот котиби Дмитрий Песков Путин Абрамовичнинг музокараларда иштирок этишини шахсан маъқуллаган ёки йўқлиги бўйича изоҳ беришдан бош тортди. Песков яқинда миллиардернинг бу жараёнда «дастлабки босқичда» иштирок этганини айтганди.
«Халқ хизматчиси» партияси раҳбари ва Украина делегацияси аъзоси Давид Арахамия Абрамович билан Москва ва Киев ўртасидаги музокараларнинг биринчи раунди бўлиб ўтган Гомелда ростдан ҳам учрашганини айтди.
«Мен Абрамовичнинг тинчлик музокараларида фаол иштирок этаётганини тасдиқлашим мумкин», — деди Арахамия ва миллиардер «бу жараёнга халқаро яҳудий ҳамжамияти орқали кирганини» қўшимча қилди.
Қайд этилишича, сўнгги бир неча ҳафта ичида миллиардер гуманитар масалаларга эътибор қаратган ва эҳтимолий хорижий воситачилар билан учрашувлар ўтказган. Март ойи бошида у Москвада Германиянинг собиқ канцлери Герхард Шредер, шунингдек, Россия делегацияси раҳбари Владимир Мединский билан учрашган.
Тадбиркорнинг шахсий самолёти Исроил ва Туркияда кузатилган, бироқ Исроил бош вазири Нафтали Беннетнинг матбуот котиби Абрамовичнинг мамлакатнинг музокараларда иштирок этишига таъсирини рад этган. Туркия Президенти Ражаб Тоййиб Эрдўғоннинг матбуот котиби изоҳ беришдан бош тортди.
«У қўлидан келган ҳамма нарсани қилишга ҳаракат қилмоқда», — деди Абрамовичга яқин манба FT’га.
Миллиардернинг вакили музокаралар жараёнига халақит бермаслик учун жараённинг бориши ёки Абрамовичнинг унда иштирок этиши ҳақида изоҳ беришдан бош тортди.
Шу билан бирга, музокараларнинг боришидан хабардор бўлган Ғарб расмийлари миллиардернинг «умуман қандайдир роль ўйнаганига» шубҳа қилди. Бошқа экспертларнинг фикрича, тадбиркор Ғарб санкцияларига тушиб қолмаслик, Британиядаги активлари ва «Челси» футбол клубини бой бермаслик учун музокаралар жараёнига қўшган ҳиссасини ошириб кўрсатаётган бўлиши мумкин эди.
Аввалроқ The Wall Street Journal АҚШ Президенти Жо Байден Зеленский билан маслаҳатлашганидан сўнг мамлакат Абрамовичга қарши санкциялар қўлламагани ҳақида хабар берган эди. Газетанинг манбаларига кўра, Украина раҳбари Абрамович Москва билан музокараларда муҳим воситачига айланиши мумкинлигини айтган.
