Украина Президенти Владимир Зеленский АҚШ Президенти Жо Байден билан яқинда бўлиб ўтган телефон суҳбатида Роман Абрамовичга қарши ҳали санкциялар қўлламасликни тавсия қилди. Бу ҳақда суҳбатдан хабардор манбаларга таяниб The Wall Street Journal хабар бермоқда.

Абрамович март ойида Буюк Британия ва Европа Иттифоқи санкцияларига учраган эди. АҚШ Молия вазирлиги ҳам тадбиркорга қарши санкциялар эълон қилишга тайёрланаётганди.

Бироқ, манбаларнинг маълум қилишича, АҚШ Миллий хавфсизлик кенгаши Зеленскийнинг маслаҳати туфайли бундай қилмасликни буюрди, чунки Абрамович Украинанинг Россия билан музокараларида муҳим воситачига айланиши мумкин.

Қайд этилишича, Абрамович музокараларни енгиллаштириш учун Россия ишбилармон доираларидаги мавқеидан фойдаланишга ҳаракат қилиши мумкинлигига ишонмоқда. Абрамович билан гаплашганларнинг айтишича, у бу жараёнга кўп вақт сарфлайди.

Парвозларни кузатиш хизмати маълумотларига кўра, сўнгги ҳафталарда Абрамовичнинг шахсий самолётлари Россия, Туркия ва Исроил ўртасида парвоз қилган. Февраль ойининг охирида — Россия ва Украина музокараларни бошлаганида — Абрамович Минскда кўрилган.

Шу билан бирга, АҚШ расмийлари Абрамовичнинг музокараларда жуда фойдали бўлганига ишониш учун асос йўқ, деб ҳисобламоқда. Айрим бошқа Ғарб давлатлари ва Украина расмийлари ҳам Абрамовичнинг жараёнга қанчалик алоқадор эканлигига шубҳа билан қараган.

АҚШ Миллий хавфсизлик кенгаши матбуот котиби Байден ва Зеленский ўртасидаги шахсий суҳбат мазмунини ошкор этишдан бош тортди. Британия ва Европа расмийлари Зеленский Лондон ва Брюсселни Абрамовичга нисбатан санкциялар қўлламасликка чақирган ёки йўқлигидан бехабар эканини маълум қилган.

Абрамовичнинг вакили Россия ва Украина ўртасидаги музокаралар жараёни ҳамда уларда миллиардернинг иштироки ҳақида изоҳ бериш ўринсиз эканини таъкидлади.

«Аввал хабар қилинганидек, у Украинадаги яҳудий ташкилотлари илтимосларга жавобан тинчликни имкон қадар тезроқ тиклаш бўйича саъй-ҳаракатларни қўллаб-қувватлаш учун барча имкониятларни ишга солмоқда», — деди Абрамовичнинг матбуот котиби.

Февраль ойида The Jerusalem Post ва The Guardian нашрлари Абрамович Киев илтимосига кўра музокараларга кўмаклашаётгани ҳақида хабар берган эди. Шундан сўнг миллиардернинг вакили нашрларга Украина томони «тинч йўл билан келишувга эришиш учун ёрдам сўраб Роман Абрамовичга мурожаат қилгани ва шундан бери у ёрдам беришга ҳаракат қилаётганини» тасдиқлаган.

Аввалроқ Португалия санкцияларга учраган Абрамович бўйича яна бир муносабат билдиргани хабар қилинганди. Шунингдек, Европа Иттифоқи Роман Абрамович ва «Яндекс» раҳбарига янги санкциялар киритгани ҳақида хабар берилди.