Украиналик миллиардерларнинг бойлиги Россиянинг мамлакатдаги уруши бошланганидан бери умумий ҳисобда 9,7 миллиард долларга (45 фоизга) камайди. Бу ҳақда Forbes ёзмоқда.
Маълум қилинишича, баҳолаш 11 март ҳолатига кўра ўтказилди. Украиналик миллиардерларнинг умумий капитали бундан ҳам камаймаганининг сабабларидан бири шундаки, уларнинг баъзилари активларининг муҳим қисмини мамлакатдан ташқарида сақлайди.
Дунёнинг энг бой одамлари рейтингига етти нафар украиналик миллиардер кирди. Уларнинг умумий бойлиги 11,9 миллиард долларга баҳоланмоқда, бу 2021 йилнинг март ойидаги рейтингдан 7 миллиард долларга кам.
Қайд этилишича, 2021 йил давомида собиқ Президент Пётр Порошенко рўйхатдан чиқиб кетди. Бироқ бойлиги 1,1 миллиард долларга баҳоланган Revolut асосчиси Влад Яценко рўйхатга қўшилди.
Энг бой украиналиклар рўйхатида «Метинвест» кон-металлургия компанияси эгаси, бизнесмен Ринат Ахметов етакчилик қилди, унинг бойлиги 4,2 миллиард долларга баҳоланган. Шунингдек, унинг уруш бошланганидан бери йўқотишлари 4,3 миллиард долларга баҳоланмоқда.
Бундан ташқари, Украинанинг собиқ Президенти Леонид Кучманинг куёви Виктор Пинчук 1,9 миллиард доллар бойлиги билан февраль ойи охиридан бери 700 миллион доллар йўқотган. Учликни «Мухолифат блоки» партиясидан Олий рада депутати ва «Смарт Ҳолдинг» инвестиция гуруҳининг эгаси Вадим Новинский ёпди. Унинг бойлигини 1,3 миллиард долларга баҳоланмоқда, уруш бошланганидан бери эса 2,2 миллиард доллар йўқотди.
Энг бой украиналиклар рўйхатига тадбиркорлар Константин Жеваго, Геннадий Боголюбов, Влад Яценко ва Игорь Коломойский ҳам киритилган.
Аввалроқ Украина IT компаниялари мамлакатни қўллаб-қувватлаш учун 24,5 миллион доллар хайрия қилгани ҳақида хабар берилганди. Шунингдек, Илон Маск Украинага минглаб Starlink сунъий йўлдош интернети антенналарини юборгани хабар қилинди.
