Ethereum криптовалютаси яратувчиси Виталик Бутерин Черногория фуқаролигини олди. Бу ҳақда мамлакат Молия вазирлигига таяниб, маҳаллий RTCG нашри хабар берди.
Бутеринга фуқаролик Черногория бош вазири Здравко Кривокапич ҳамда молия ва ижтимоий ҳимоя вазири Милойко Спаич ташаббуси билан берилди. Бутерин Черногорияга блокчейн конференцияси учун келган ва ташриф давомида унга паспорт берилган.
Черногория ҳукумати Бутериннинг мамлакатда криптосаноатни ривожлантиришга ёрдам беришини кутмоқда. Бу соҳадаги мутахассислар билан ҳамкорлик Черногория иқтисодиётини ривожлантириш, сармояларни жалб қилиш ва юқори маошли иш ўринларини яратиш учун муҳим экани таъкидлаб келинади.
Виталик Бутерин 1994 йилда Москва яқинидаги Коломна шаҳрида туғилган, у ердан оиласи Канадага кўчиб ўтган.
2014 йилда у Питер Тил мукофотини олди, бу унга эътиборини Bitcoin криптовалюта тармоғини ўрганишга ва бир йилдан сўнг ўзининг Ethereum блокчейн платформасини ишга туширишга имкон берди.
2021 йилда 27 ёшли Бутерин Forbes маълумотларига кўра дунёдаги энг ёш криптомиллиардерга айланди. Рейтингни тузиш вақтида унинг бойлиги 1,3 миллиард долларга баҳоланган.
Аввалроқ дунёнинг энг бой криптомиллиардерлари рейтинги эълон қилинганди.
