Ўзбекистонда олти ойда савдо, хизмат кўрсатиш ва умумий овқатланиш корхоналари қанча солиқ тўлагани очиқланди
Ярим йил давомида ушбу йўналишда фаолият юритувчи 163 минг 932 та юридик шахс томонидан 23,5 триллион сўмдан ортиқ солиқ тўланган.
2026 йилнинг январь—июнь ойларида Ўзбекистонда савдо, хизмат кўрсатиш ва умумий овқатланиш соҳаларида фаолият юритаётган корхоналар жами 43,3 триллион сўмдан ортиқ солиқ тўлади. Бу ҳақда Солиқ қўмитаси хабар берди.
Ҳисоботга кўра, энг катта солиқ тушуми хизмат кўрсатиш соҳасига тўғри келган. Олти ой давомида ушбу йўналишда фаолият юритувчи 163 минг 932 та юридик шахс томонидан 23,5 триллион сўмдан ортиқ солиқ тўланган. Шундан 4,7 триллион сўмга яқини ёки жами тушумнинг 19,8 фоизи 20 та йирик корхона ҳиссасига тўғри келган. Мазкур корхоналарнинг товар айланмаси 41 триллион сўмни, фойдаланган солиқ имтиёзлари эса 2,8 триллион сўмдан ошган.
Савдо соҳасида эса 163 минг 597 та юридик шахс томонидан 18,8 триллион сўмдан ортиқ солиқ тўланган. Солиқ қўмитаси маълумотларига кўра, ушбу сумманинг 1,7 триллион сўми ёки 9 фоизи энг йирик 20 та корхона ҳиссасига тўғри келган. Уларнинг жами товар айланмаси 30,2 триллион сўмни, қўлланилган солиқ имтиёзлари эса 190,3 миллиард сўмни ташкил этган.
Умумий овқатланиш соҳасида фаолият юритувчи 23 минг 148 та юридик шахс эса ҳисобот даврида 1 триллион сўмдан ортиқ солиқ тўлаган. Шундан 215,9 миллиард сўми, яъни жами тушумнинг 21,4 фоизи 20 та йирик корхона ҳиссасига тўғри келган. Уларнинг товар айланмаси 2,8 триллион сўм, фойдаланган солиқ имтиёзлари эса 25 миллиард сўмни ташкил этган.
Солиқ қўмитаси маълумотларига кўра, хизмат кўрсатиш соҳасидаги энг йирик 20 та солиқ тўловчи орасида “Ўзбектелеком” АЖ, Asia Trans Gas МЧЖ ва Uzbekistan Airways АЖ етакчилик қилган.
Савдо соҳасида Anglesey Food МЧЖ ХК, Oilpro Invest Plus МЧЖ ҳамда Uzum Market МЧЖ ХК, умумий овқатланиш соҳасида эса International Foodchain МЧЖ, Маk Food Servis МЧЖ ва “Кетринг” МЧЖ энг кўп солиқ тўлаган корхоналар сифатида қайд этилган.
