Сан-Франциско суди миллиардер Илон Маскнинг Tesla компаниясини хусусийлаштиришни молиялаштириш таъминлангани ҳақидаги даъвоси ҳақиқатга тўғри келмайди, дея қарор қилди. Бу ҳақда Маск устидан судга мурожаат қилган Tesla инвесторларига таяниб, Reuters хабар бермоқда.
«Суд Маскнинг баёнотларини ‘ёлғон ва чалғитувчи’ деб топди ва у (Маск — таҳр.) бу баёнотларни ‘ёлғон эканини била туриб, ўйламасдан қилган’ деб қарор чиқарди» — деди инвесторлар.
Судда сармоядорлар Маскнинг твитлари «қарама-қарши ва ёлғон маълумотларни тақдим этиш ва уларга етказилган зарарни қоплаш учун оммавий кампания» сифатида тан олинишини талаб қилмоқда. Иш май ойида судда кўриб чиқилади.
Маскнинг таъкидлашича, у 2018 йилда Tesla акцияларини қайтариб сотиб олиш ва уни хусусий компанияга айлантириш учун етарли маблағ эга бўлган.
Tesla ва Маскнинг адвокати Алекс Спиро ҳам миллиардер 2018 йилда Tesla’ни хусусийлаштириш ҳақида ўйлаётганини ва бу ҳаракат учун барча маблағ борлигини айтганди.
Унинг қўшимча қилишича, тадбиркорга қарши барча даъволар пул ишлашга уринаётган даъвогарларнинг тасодифий адвокатлари томонидан қўзғатилган, бошқалари эса бу ҳақиқатнинг ошкор этилишига йўл қўймасликка ҳаракат қилмоқда ва буларнинг барчаси сўз эркинлиги зарарига ишламоқда.
Судга сабаб бўлган твит
Судга сабаб бўлган твит 2018 йил август ойида Илон Маск томонидан ёзилган. Унда Маск Tesla акцияларини биржадан қайтариб сотиб олиш режаларини эълон қилиб, битим учун зарур бўлган молиялаштириш «таъминланган»лигини таъкидлаган.
Қайд этилишича, компанияни хусусийлаштириш уни ҳар чоракда ҳисобот тақдим этиш заруратидан халос қилади ва менежментга акциядорларнинг умидлари ҳақида қайғурмасдан, хавфлироқ, узоқ муддатли лойиҳаларни амалга ошириш учун кўпроқ эркинлик беради.
Маскнинг твити биржада Tesla котировкаларининг ошишига сабаб бўлди. Аммо АҚШ Қимматли қоғозлар ва биржалар комиссияси миллиардерни инвесторларни чалғитаётганликда айблаб, Tesla бошқарувидан четлаштиришни талаб қилиб, судга мурожаат қилди.
Оқибатда миллиардер Tesla директорлар кенгаши раиси лавозимини тарк этди ва 20 миллион доллар жарима тўлади.
