Россиялик миллиардер Андрей Мельниченконинг рафиқаси Александра Европа Иттифоқининг унга нисбатан қўйган санкцияларига суд орқали эътироз билдирмоқчи. Бу ҳақда Reuters агентлиги маълум қилди.
Унинг сўзларига кўра, Европа расмийларининг Мельниченкога нисбатан қўйилган санкцияларни унинг рафиқасига нисбатан узайтириш ҳақидаги қарори «мантиқсиз», чунки у ҳеч қачон Россия фуқаролигига эга бўлмаган ва Россияда яшамаган.
«Белградда туғилган, Сербия ва Хорватия фуқаролигига эга Александра Мельниченко ўзига қарши чиқарилган бахтсиз қарорга кескин эътироз билдиради», — деди унинг матбуот котиби.
ЕИ ҳафта бошида олтинчи санкциялар пакети доирасида Мельниченконинг рафиқасига қарши ҳам санкциялар киритди. Европа Иттифоқи расмийлари тадбиркорнинг рафиқаси «давлатдан фойдаланади ва эрининг бойлигидан фойда кўради» деб ҳисоблаган. Ўша куни миллиардер Алексей Мордашовнинг рафиқаси Марина ҳам чекловлар остида қолди.
Май ойи охирида Reuters агентлиги Андрей Мельниченко Европа Иттифоқининг санкциялар рўйхатига киритилишидан сал аввал ўз мол-мулкини рафиқасига ўтказгани ҳақида хабар берган эди.
Агентлик манбаларига кўра, 2006 йилдан бери Александра Мельниченко траст ҳужжатларида СУЭК ва «Еврохим» бенефициарлари рўйхатида эридан кейин иккинчи ўринни эгаллаган ва тадбиркор вафот этган тақдирда мулкни мерос қилиб олиши керак бўлган.
Андрей Мельниченко ишончли шахсларни бенефициарлардан воз кечгани ҳақида хабардор қилди, шундан сўнг миллиардернинг икки компаниядаги улушлари унинг рафиқасига ўтказилди.
Аввалроқ Европа Иттифоқи санкциялари остида қолган Андрей Мельниченконинг ўзи ҳам ЕИга суд орқали эътироз билдиришини маълум қилганди.
