Microsoft асосчиси Билл Гейтс ўзининг Gates Notes блогида ёзги ўқиш учун китоблар тўпламини чоп этди. Миллиардер улар ««таътил учун жуда оғирлик қилиши» мумкинлиги ҳақида огоҳлантирди.
«Бу ерда гендер тенглиги, сиёсий қутбланиш, иқлим ўзгариши ва ҳаёт ҳақида камдан-кам ҳолларда режага мувофиқ кетадиган китоблар бор. Пляжда ўқиш учун эмас», — деди Гейтс.
«Куч», Наоми Алдерман
«Куч» — британиялик ёзувчи Наоми Алдерманнинг 2016 йилда чоп этилган илмий-фантастик романи. Билл Гейтснинг айтишича, бу китобни унга катта қизи Женнифер тавсия қилган.
Билл Гейтснинг фикри:
«Ушбу китобни ўқиш менга кўплаб аёллар дуч келадиган адолатсизлик ва зўравонликларни яхшироқ тушунишга ёрдам берди. Мен АҚШ ва бутун дунёда ушбу муаммолар билан ишлаётган фаолларга ўз миннатдорчилигимни билдираман».
«Нега биз қутбланганмиз?» (Why We’re Polarized), Эзра Кляйн
Гейтснинг айтишича, у келажакка некбинлик билан қарашга ҳаракат қилмоқда, бироқ АҚШдаги сиёсий қутбланиш дунёга нисбатан қарашини хиралаштирмоқда. Бу мавзу сиёсий таҳлилчи ва Vox сайти ҳаммуассиси Эзра Кляйннинг китобида кўриб чиқилади.
Билл Гейтснинг фикри:
«Агар сиз ҳозир АҚШда сиёсат билан нима бўлаётганини тушунмоқчи бўлсангиз, бу китоб сиз учун».
«Линкольн шоссеси», Амор Тоулз
Америкалик ёзувчи Амор Тоулзнинг асарлари Билл Гейтс рўйхатига биринчи марта киритилаётгани йўқ. 2019 йилда энг кўп сотилган «Москвадаги жаноб» китобини ҳам тавсия қилганди.
Билл Гейтснинг фикри:
«Тоулз саёҳатдан илҳом олади. Бу шуни кўрсатадики, бизнинг йўлимиз олдиндан айтиб бўлмайдиган ва чизиқли эмас, биз буни қанчалик хоҳламасак ҳам».
«Келажак вазирлиги», Ким Стенли Робинсон
«Келажак вазирлиги» 2020 йилда ёзилган илмий-фантастик роман бўлиб, у иқлим ўзгаришига бағишланган. Яқин келажак ҳақида ҳикоя қиладиган асар иқлим ўзгариши кампаниясини бошқарадиган хаёлий глобал ташкилот ҳақида.
Билл Гейтснинг фикри:
«Бу шундай чуқур китобки, уни умумлаштириш қийин. Робинсон ҳаяжонли ғоя ва қаҳрамонлар билан тўлдирилган жозибали ҳикояни тақдим этди».
Дунё аслида қандай ишлайди: биз бу эрга қандай келганимиз ва қаерга кетаётганимиз ортидаги илм (How the World Really Works: The Science Behind How We Got Here and Where We’re Going), Вацлав Смил
Гейтс иқтисод профессори Вацлав Смилнинг янги китобини «менинг севимли муаллифларимдан бирининг яна бир дурдона асари» деб атади. 2017 йилда Гейтс ўша пайтда нашр этилган Смилнинг 37 та китобини ҳаммасини ўқиб чиққанини ёзганди.
Янги китобда иқтисодчи энергия цивилизация тарихига қандай таъсир қилгани ҳақида сўзлаб беради.
