Россиялик миллиардер Роман Абрамович Буюк Британияда 20 йил давомида 1,75 миллиард фунт стерлинг (тахминан 2,2 миллиард доллар) солиқ тўлаган. Бу ҳақда The Times нашри хабар бермоқда.
«Челси» клубининг собиқ эгаси вакилларининг таъкидлашича, биргина 2019–2020 йилларда миллиардер ва унинг компанияси корпоратив солиқ, давлат божи ва миллий суғурта бадаллари сифатида 41 миллион фунт стерлингдан (тахминан 51 миллион доллар) кўпроқ пул тўлаган.
«Бу Абрамовични энг яхши 25 солиқ тўловчилар қаторига киритиш имконини беради», дейилади Европа умумий юрисдикция судига тақдим этилган ҳуқуқий ҳужжатларда.
Тахминларга кўра, худди шундай ҳужжатлар Британия ҳукуматига юборилган.
Санкциялар, айбловлар ва жавоблар
Миллиардер унга нисбатан қўлланилган санкциялар камситиш, номутаносиблик ва Абрамовичнинг Президент Владимир Путинга яқинлиги ҳақидаги «ёлғон даъволарга» асосланганини исботлашга уринмоқда.
Абрамович, шунингдек, Буюк Британия ва ЕИда Россиядан кўра кўпроқ солиқ тўлашини, шу боис уни Украинага босқинни молиялаштирувчи деб ҳисоблаш мумкин эмаслигини таъкидлайди.
Бундан ташқари, ҳуқуқшуносларнинг таъкидлашича, Абрамович Буюк Британияга 2 миллиард фунт стерлинг (тахминан 2,5 миллиард доллар) сармоя киритган ҳамда «Челси» ва бошқа жойларда 1000 га яқин британияликни иш билан таъминлаган.
Шунингдек, улар Абрамовичнинг бизнесининг бош қароргоҳи Лондонда жойлашганини эслатмоқда.
Буюк Британиянинг 50 та энг яхши солиқ тўловчилари рўйхатини тузувчи Роберт Уоттснинг айтишича, Абрамовичнинг солиқлари унга рўйхатда «мустаҳкам ўрин» берган бўларди, бироқ россиялик миллиардер солиқ маълумотлари йўқлиги сабабли киритилмаган.
Бундан ташқари, ҳужжатларда адвокатлар Абрамовичнинг Россия расмийлари билан ҳеч қандай алоқаси йўқлиги ва россиялик шахслардан ёки Украинага ҳужумдан фойда кўрмаслигини таъкидлайди.
«Аксинча, Абрамович ўз бойлигини Владимир Путин Президент бўлишидан олдин қўлга киритган», — дея ҳужжатдан иқтибос келтирган The Times нашри.
Баёнотга Украинанинг Россия билан музокаралар олиб бораётган делегацияси раҳбари Девид Арахамиянинг мактуби илова қилинган бўлиб, унда миллиардернинг саъй-ҳаракатлари гуманитар йўлакларни яратишга ёрдам бергани, улар орқали 400 мингдан ортиқ тинч аҳоли эвакуация қилингани айтилади.
