Июнь ойида Европа Иттифоқида енгил автомобиллар савдоси пасайишда давом этиб, 2021 йилнинг июнь ойига нисбатан 15,4 фоизга паст бўлди. Бу ҳақда Европа автомобиль ишлаб чиқарувчилари ассоциацияси (ACEA) хабар берди.
ACEA пасайишнинг асосий сабаби сифатида бутловчи қисмларни етказиб бериш билан боғлиқ муаммоларни келтирган. Бу автомобиллар ишлаб чиқаришга тўсқинлик қилмоқда.
Умуман олганда, июнь ойида ЕИда 886,5 минг дона автомобиль сотилган, бу 1996 йилдан бери қайд этилган энг паст кўрсаткичдир.
Савдоларнинг пасайиши Европа Иттифоқининг энг йирик автомобиль бозорларидан тўрттасида қайд этилди. Хусусан, енгил автомобиллар савдоси ҳажми Германияда 18,1, Италияда 15, Францияда 14,2, Испанияда эса 7,8 фоизга камайган.
ЕИда энг кўп пасайиш кузатилган давлат Хорватия бўлди — 28.4 фоиз. Ягона ўсиш қайд этган Латвияда автомобиллар савдоси 2021 йилгига қараганда 6,2 фоизга кўпайди.
Европа Иттифоқида автомобилларнинг умумий савдоси 2022 йилнинг биринчи ярмида 4,6 миллион донани ташкил этди, бу 2021 йилга нисбатан ўн тўрт фоизга кам.
Автомобиль ишлаб чиқарувчилари орасида июнь ойида сотувларнинг энг сезиларли пасайиши Volkswagen Group (-22,3 фоиз), Volvo (-45,7 фоиз), Mazda (-42,7 фоиз), Mitsubishi (-27,8 фоиз) компаниялари ҳиссасига тўғри келди. Mercedes-Benz Group (+4,2 фоиз) ва Renault Group (-0,04 фоиз) савдолар пасайишидан энг кам зарар кўрди.
