Мисрнинг Товар етказиб бериш бош бошқармаси (GASC) Украинанинг «Нибулон» ва Inerco Trade компанияларини февраль ва март ойларида 240 минг тонна буғдой етказиб бериши керак бўлган шартнома мажбуриятларидан озод қилди. Бу ҳақда Reuters агентлиги вазиятдан хабардор манбаларга таяниб хабар берди.
Нашр маълумотларига кўра, Украина уруш бошлангани сабаб тўрт партия ғаллани юборишга улгурмаган. Шу билан бирга, шартномада форс-мажор ҳолатлари тўғрисида банд ҳам бўлмаган.
Тадбиркорларнинг таъкидлашича, бекор қилинган буюртма декабрь ойида бир тоннаси учун 346 дан 360 долларгача бўлган нархларда, юк ташиш харажатларини қўшган олган ҳолда сотиб олинган.
Украинада бошланган уруш дунёда ғалла нархининг ошишини тезлаштирганидан сўнг GASC апрель ойида буғдойнинг бир тоннаси учун 494,25 доллар тўлаган.
Россия ва Украина ўртасида дон экспорти борасида эришилган келишувлар доирасида Черноморск портида ғалланинг яна бир партияси ортилган ва тез орада жўнатилиши кутилмоқда.
Reuters 2022 йил май ойида Мисрга юборилиши мўлжалланган 300 минг тонна ғалла Украинада қолиб кетаётганини ёзган эди. Қоҳира ўзининг стратегик захираларини кўпайтириш мақсадида дон етказиб беришни диверсификация қилишга интилмоқда. Хусусан, Миср Ҳиндистон донини сотиб олиш бўйича келишувга эришди.
Reuters маълумотларига кўра, июль ойида мамлакат тендерлар ва тўғридан-тўғри харидлар орқали бир миллион тоннадан ортиқ буғдой харид қилган.
Россиянинг Украинага ҳужуми бошланганидан сўнг, мамлакат портларидан дон экспорт қилинмади. Киев бунинг учун Москвани айблади, Россия эса, ўз навбатида, Украина қўшинлари портларни миналаштириши туфайли озиқ-овқат экспорти имконсиз эканини даъво қилди.
Россия ва Украина 22 июль куни Украина портларидан донни экспорт қилишга рухсат берувчи алоҳида келишувларни имзолади. Музокараларга Туркия ва БМТ воситачилик қилди. Анқаранинг аниқлик киритишича, келишув аниқ вақт билан чекланмаган.
Шу билан бирга, Россия ва БМТ ўртасида яна бир ҳужжат имзоланди, унга кўра ташкилот Россия қишлоқ хўжалиги маҳсулотларини экспорт қилиш бўйича чекловларни олиб ташлашга Москвага ёрдам беради.
Ғалла Одесса, Черноморск ва Южний портларидан Қора денгиздаги хавфсиз йўлак бўйлаб ташилади. Унинг акваторияси(сув ҳудуди)га кириш ва чиқишда кемалар қурол-яроғ ташилишининг олдини олиш мақсадида қўшма мувофиқлаштириш марказ вакиллари томонидан текширилади. Истанбулдаги марказ аллақачон ўз фаолиятини бошлаган.
Аввалроқ Туркия Украина дони экспортига оид шартнома имзоланишини эълон қилган эди. АҚШ ушбу келишувни олқишлади ва Россиянинг шартномага амал қилишда масьулиятли бўлишига эътибор қаратишини маълум қилди.
Кейинроқ эса Украина ғалласи Туркия портларига қайта жўнатилиши хабар берилди. Унга кўра, Украина ғалласини Одесса, Черноморск ва Южний портларидан экспорт қилиш бўйича келишув юкларни хавфсиз йўллар орқали Туркия портларига етказиб беришни, у ердан белгиланган манзилга жўнатишни назарда тутади.
