Шавкат Мирзиёев Astrum академиясида IT соҳаси вакиллари билан учрашгани хабар қилинганди. Президент йиғилишда соҳадаги камчиликларни санаб ўтди.
Маълум бўлишича, учрашувда қуйидаги 4 та масалани ҳал этиш лозимлиги кўрсатиб ўтилган. Биринчидан, интернет қамрови ва сифатини кескин ошириш зарур. Ҳудудларнинг оптик толали тезкор мобил интернет (4G) билан қамраб олиш даражаси 70 фоиз атрофида экани, 118 та қишлоқларга Интернет ҳам, мобил алоқа ҳам кириб бормаганлиги таъкидланган.
Иккинчидан, IT соҳасида иқтидорли ёшларни аниқлаш ва уларни қўллаб-қувватлашни янада кенгайтириш кераклиги айтилган. Бугунги кунда бундай ёшларнинг стартапларига (230 та) атиги 10 миллиард сўм грантлар ажратилгани қайд этилган. Ёки, компьютер хариди учун 3,5 минг нафар ёшларга кредит берилган бўлса, кафил йўқлиги учун 6,5 мингдан зиёд ёшларга кредит бериш рад этилгани маълум қилинган.
Қорақалпоғистон, Бухоро, Қашқадарё, Сурхондарё, Наманган ва Навоийда IT-паркларни ташкил этиш ишлари якунига етказилмагани таъкидланган.
Шунингдек, Президент барча вазирлар, ҳокимлар ва тармоқ раҳбарлари, олийгоҳлар ректорлари рақамлаштиришни биринчи навбатдаги вазифалар қаторига олиб чиқиши лозимлигини таъкидлаган.
Бу борада адлия, меҳнат, олий ва халқ таълими вазирликлари, солиқ, божхона идоралари, Навоий комбинати, «Автосаноат», «Саноат қурилиш банки»да рақамлаштириш бўйича натижалар борлиги қайд этилган.
Лекин, Транспорт, Энергетика вазирликлари, Ветеринария қўмитаси, Uzbekistan Airports, «Темир йўллари», «Агросуғурта»да ишлар аҳволи сустлиги айтилган.
«Хорижий корхоналар ёшларимизга ишонч билдириб, жорий йилнинг ўзида 100 миллион долларлик хизматларга буюртма берган. Лекин, маҳаллий корхоналаримиз буюртмалари бундан анча кам. Бундан ташқари, ҳудудларда ёшларни экспорт бозорларига чиқишга кўмаклашадиган тизим яратишимиз шарт ва зарур», — деган Президент.
Аввалроқ Шавкат Мирзиёев Мирзо-Улуғбек туманидаги IT-парк қурилиши билан танишганди.
«Ҳозирги замонда хизматларнинг катта қисми ахборот технологиялари орқали кўрсатилаяпти. Бошқа соҳаларнинг ҳам самарадорлиги шунга боғлиқ. Шунинг учун бу ердаги шароитларни кенгайтириб, замонавий IT-хабга айлантириш керак», — деганди Шавкат Мирзиёев.
