Дунёнинг энг бой одами Илон Маск (бойлиги Forbes Real-Time маълумотларига кўра, 257,3 миллиард доллар) нефть ва газ қазиб олишни давом эттириш цивилизацияни сақлаб қолиш учун зарурлигига ишонади.
«Ҳақиқатан ҳам, мен нефть ва газни қисқа муддатли даврда ишлатишимиз керак, деб ўйлайман, акс ҳолда цивилизация қулайди», — деди Tesla асосчиси ва бош директори Норвегияда бўлиб ўтган энергетика анжумани чоғида.
Норвегия нефть ва газ қудуқлари учун қидирув бурғилаш ишларини давом эттириши керакми, деган саволга Маск ҳозирда бундай ишларга эҳтиёж борлигини таъкидлади.
Миллиардернинг тушунтиришича, яшил энергия ва барқарор иқтисодиётга ўтиш «дунё дуч келган энг катта ташвишлардан бири».
«Бу бир неча ўн йиллар давом этади», — деди у.
Шунингдек, Маск цивилизацияни қўллаб-қувватлаш учун туғилишлар сони кўпайиши кераклигини айтди.
Аввалроқ ҳам Маск цивилизация давом этиши учун одамлар фарзанд кўришни кўпайтириши кераклигини айтганди. Миллиардер тезлик билан пасайиб бораётган туғилишни «цивилизация учун энг катта хавфлардан бири» деб атаган.
