Марказий банк бошқарувининг навбатдаги йиғилиши якунларига бағишланган матбуот анжумани бўлиб ўтди. Мазкур анжуманда банк раиси Мамаризо Нурмуратов Uzcard ва Humo тўлов тизимлари интеграция қилиниши масаласи нега чўзилаётгани ҳақида саволга жавоб берди.

«Бу борада амалга оширилаётган ишлар чўзилгани рост. Uzcard хусусий корхона бўлгани сабабли кўп жиҳатларда ўзаро келишишга тўғри келяпти. Масалан, қайсидир хизматга қайсидир тўлов тизими комиссия тўловларини олиши, бошқасида бу комиссион тўлов бўлмаслиги мумкин. Мана шу борада ҳам маълум тўхтамларга келишимиз тўғри келяпти», — деди Нурмуратов.

Марказий банк раисининг маълум қилишича, май ойигача иккала тўлов тизимининг банкоматлари интеграция қилиниши мумкин.

«Биз май ойигача иккала тўлов тизимининг банкоматларини интеграция қилиниши бўйича иш олиб боряпмиз. Кейинги босқичда эса терминаллар ҳам интеграция қилиниши кўзда тутилган», дея қўшича қилди Мамаризо Нурмуратов.