Ўзбекистон валюта биржасида 2022 йили савдоларнинг умумий ҳажми рекорд даража — 706,79 триллион сўмга етди. Бу 2021 йилнинг мос кўрсаткичига нисбатан ўсиш 81,60 фоизни ташкил этган, дея хабар берди валюта биржаси ахборот хизмати.

Валюта бозори ҳақида

Қайд этилишича, 2022 йил якунлари бўйича биржа валюта бозоридаги савдоларнинг умумий ҳажми 338,34 триллион сўмни ташкил этиб, 2021 йилнинг мос кўрсаткичига нисбатан 1,5 баробар ошган.

Ўзбекистон валюта биржасида 2022 йил давомида бир қатор стратегик аҳамиятга эга ишлар амалга оширилган, жумладан:

• ички валюта бозорида тижорат банкларининг миллий валюта курси шаклланишидаги фаоллигини ошириш мақсадида бозор тамойилларига мувофиқ маркет-мейкерлик фаолияти жорий этилди;
• рискларни самарали бошқариш мақсадида Ўзбекистон валюта биржаси валюта бозорида марказий контрагент фаолияти йўлга қўйилди;
• дефолт-менежментнинг самарали тизими жорий этилиб, Марказий контрагент фаолияти билан чамбарчас боғлиқ бўлган ликвидлик провайдерлари фаолияти ҳам йўлга қўйилди. Бунинг оқибатида, рискни бошқариш механизмлар кўлами кенгайтирилди.

Маълумот учун, Ўзбекистон валюта биржаси валюта бозорида АҚШ доллари, евро, Россия рубли ва Хитой юани олди-сотдиси бўйича спот операциялари Rhombus платформасида «колл-аукцион» ҳамда икки томонлама узлуксиз аукцион замонавий усуллари орқали амалга оширилади.

Пул бозори тўғрисида

Ўзбекистон валюта биржасига кўра, банклараро пул бозорида бугунги кунда махсус электрон платформа орқали тижорат банкларининг бўш пул маблағларини 1 кундан 1 йилгача бўлган муддатга жалб қилиш ва жойлаштириш бўйича савдолар ўтказилиб, Марказий банкнинг тижорат банклари билан депозит аукционлари ҳам ташкил этилган.

Ушбу бозордаги савдоларнинг умумий ҳажми 2022 йилда рекорд даража — 270,61 триллион сўмни ташкил этиб, 2021 йилги кўрсаткичга нисбатан деярли 93 фоизга ошган.

Давлат қимматли қоғозлари бозори

Ушбу бозорда Ўзбекистон валюта биржасининг электрон савдо-депозитар платформаси орқали Молия вазирлигининг ғазначилик мажбуриятлари ва облигациялари, шунингдек, Марказий банкнинг облигациялари бирламчи жойлаштирилиши ва иккиламчи муомаласи бўйича савдолар, шунингдек РЕПО операциялари ташкил этилган.

2022 йилда ушбу бозорда жами 87,29 триллион сўм қийматида давлат қимматли қоғозлари жойлаштирилган бўлиб, 2021 йилга нисбатан ушбу кўрсаткич 3,5 баробар ошди.