Англия банки базавий ставкани 2008 йил октябрь ойидан бери энг юқори даражага кўтарди

Англия банки базавий фоиз ставкасини 2008 йил октябрь ойидан бери энг юқори даражага кўтарди — 4 фоиз. Регулятор ставканинг ўнинчи марта кетма-кет ўсишини 10,5 фоизлик юқори инфляция билан изоҳлаб, иқтисодиёт беш ой давом этиши мумкин бўлган рецессияни бошдан кечираётганини тан олди

Англия банки базавий фоиз ставкасини 3,5 фоиздан 4 фоизга кўтарди ва бу 2008 йилнинг октябрь ойидан буён энг юқори даражага етди, ўшанда базавий ставка 4,5 фоизни ташкил қилган эди, дея хабар беради регулятор матбуот хизмати.

Bloomberg’нинг қайд этишича, бу Англия банки пул-кредит сиёсатини қатъийлаштиришни бошлаган 2021 йил декабридан бери ўнинчи марта ставканинг ошиши ҳисобланади.

Англия банки ўз қарорини «Буюк Британиядаги ички инфляция босими кутилганидан кучлироқ бўлиб чиқди», деб тушунтирди, шу билан бирга, инфляцияни мақсадли 2 фоиз даражасига қайтариш учун зарур бўлганда ставкани қўшимча тузатишга ваъда берди.

Буюк Британияда декабрь ойида инфляция 10,5 фоизни ташкил этди, бу асосан энергия ва бошқа товарлар нархининг ошиши билан боғлиқ. Регулятор инфляция 2023 йил охиригача 4 фоизгача, 2024 йилнинг иккинчи чорагида эса 2 фоиздан пастга тушишини кутмоқда.

Англия банки баёнотида айтилишича, Буюк Британия иқтисодиёти аллақачон таназзулга юз тутган, аммо энергия нархларининг тушиши ва бозор ставкаларининг пасайиши эҳтимоли туфайли бу унинг ноябрь ойидаги сўнгги прогнозида кутилганидан «жуда юмшоқроқ» бўлиши мумкин. Регулятор 2023 йилда мамлакат ялпи ички маҳсулоти 0,5 фоизга қисқаришини кутмоқда (ноябрдаги прогноздагидек 1,5 фоиз эмас).

Англия банки маълумотларига кўра, келгуси йилларда иқтисодиёт ҳар йили атиги 0,7 фоизга ўсиши мумкин ва камида 2026 йилгача COVID-19 дан олдинги даражага тикланмайди. «Бу ўсиш учун етти йил йўқотилган деган маънони англатади», деб таъкидлайди Reuters.

Бунинг сабаблари орасида Англия банки бир қатор иқтисодий тебранишларни, жумладан, Украинадаги воқеалар туфайли энергия нархининг кўтарилиши, пандемия туфайли ишчилар сонининг қисқариши ва Brexit’дан кейин Европа Иттифоқидан келган ишчиларга мамлакатга киришга қўйилган чекловлар бизнесга сармоя етишмаслиги ва паст маҳсулдорликни келтириб чиқарди.

Эслатиб ўтамиз, бир кун аввал АҚШ Федерал захира тизими (ФЗТ) базавий ставка оралиғини 0,25 фоиз пунктга кўтариб, йиллик 4,5-4,75 фоизгача оширганди. Бу АҚШ иқтисодиёти узоқ ва чуқур таназзул ёқасида бўлган 2007 йилдан бери энг юқори кўрсаткичдир.

Koʻrishlar soni: 383