Shavkat Mirziyoyev ShHT doirasida savdoni soddalashtirish bo’yicha bitim ishlab chiqishni taklif qildi
Davlat rahbari savdoni soddalashtirish bo’yicha bitimga savdo to‘siqlarini bartaraf etish, texnik reglamentlar va sertifikatlash, fitosanitariya va veterinariya nazorati tizimlarini yaqinlashtirish masalalari bo‘yicha chora-tadbirlarni kiritish kerakligini ta'kidladi.
Prezident Shavkat Mirziyoyev Qozogʻistonning Ostona shahrida oʻtkazilgan Shanxay hamkorlik tashkiloti Davlat rahbarlari kengashida tashkilot doirasida savdoni soddalashtirish boʻyich bitim ishlab chiqishni taklif qildi. Bu haqda Prezident matbuot xizmati xabar berdi.
Davlat rahbari kengash yigʻilishida soʻzlagan nutqida 2023-yilda Oʻzbekistonning tashkilotga aʼzo davlatlar bilan savdo aylanmasi 20 foizga oʻsgani, 2024-yil boshidan buyon bu miqdor yana 15 foizga oshganini taʼkidlagan. Shunga koʻra, Prezident tashkilot doirasida savdoni soddalashtirish boʻyicha bitim ishlab chiqish va unga quyidagi masalalar yuzasidan chora-tadbirlarni kiritishni taklif qildi:
- savdodagi toʻsiqlarni bartaraf etish;
- texnik reglamentlar va sertifikatlash;
- fitosanitariya va veterinariya nazorati tizimlarini yaqinlashtirish.
Bundan tashqari, transchegaraviy elektron tijoratni rivojlantirish boʻyicha jahondagi tendensiyalarni hisobga olgan holda, ushbu sohada amaldagi raqamli savdo platformalari integratsiyasini koʻzda tutuvchi hamkorlik dasturini tayyorlash taklif etildi.
Shuningdek, sanoatning yuqori texnologiyali tarmoqlari va xizmat koʻrsatish sohalarida oʻzaro investitsiyalarni ragʻbatlantirish boʻyicha kompleks chora-tadbirlarni ishlab chiqish, ushbu loyihalarni moliyaviy qoʻllab-quvvatlash mexanizmlarini puxta oʻylab koʻrish hamda ShHT Jamgʻarmasi va Taraqqiyot bankini tashkil etish masalasini koʻrib chiqishga qaytish muhimligi aytildi.
Prezident SHHTda “Sharq-Gʻarb” va “Shimol-Janub” yoʻnalishlarida inklyuziv transport tizimlarini shakllantirish, logistika jarayonlarini raqamlashtirish rejasini ishlab chiqish, shu jumladan, chegaralar orqali oʻtadigan mahsulotlar haqidagi maʼlumotlarning elektron almashuvini tashkil etish masalalariga toʻxtaldi.