Boeing kompaniyasi 243,6 mln dollar jarima to’laydi
Boeing kompaniyasi 2018-2019-yillarda Efiopiya va Indoneziyada sodir boʻlgan aviahalokatlar boʻyicha tergov jarayonida firibgarlikka yoʻl qoʻyganini tan olishga va 243,6 million dollar jarima toʻlashga rozi boʻldi. Biroq halokat qurbonlarining oilalari bundan norozi boʻlmoqda. Ular AQSH Adliya vazirligidan kompaniyani 24,7 milliard dollar miqdorida jarimaga tortishni soʻragan.
AQSh aerokosmik giganti Boeing 2018-yilning oktyabrida Indoneziyada hamda 2019-yilning mart oyida Efiopiyada 737 Max samolyotlari bilan sodir boʻlgan va 346 kishining hayotiga zomin boʻlgan aviahalokat boʻyicha tergov jarayonida firibgarlikka yoʻl qoʻyganini tan olishga rozi boʻldi. Bu haqda Reuters agentligi AQSh Adliya vazirligidagi manbalariga tayanib xabar berdi.
Qayd etilishicha, kompaniya tergov jarayonida ushbu ikki halokatga aloqador boʻlgan parvozlarni boshqarish tizimi boʻyicha regulyatorni chalgʻitib, hukumatni aldashda ayblanmoqda. Boeing unga qoʻyilgan ayblovni tan olish va 243,6 million dollar jarima toʻlashga rozi boʻldi. Mazkur daʼvo kelishuvi federal sudya tomonidan maʼqullanishi kutilmoqda.
Ayblovlarga iqror boʻlish kompaniyaning AQSh Moliya vazirligi va NASA bilan tuzgan shartnomalarini bajarishini qiyinlashtirishi mumkin. Kompaniya jarima toʻlashdan tashqari, 455 million dollarni uch yil ichida xavfsizlik va muvofiqlik dasturlarini takomillashtirish uchun sarflashga rozi boʻlgan. Shuningdek, kelishuv boʻyicha qurbonlarning oilalariga 500 million dollar miqdorida tovon puli toʻlanadi.
Eslatib oʻtamiz, 2024-yilning iyun oyida halokat qurbonlarining qarindoshlari boʻlgan 15 ta oila AQSh Adliya vazirligidan kompaniyani 24,78 milliard dollar miqdorida jarimaga tortishni talab qilgan edi.