Yaqin istiqbolda oylik iste’mol me’yori miqdorining oshirilishiga asos mavjud emas — Energetika vazirligi
Iyun oyida aholining 71 foizi bazaviy meʼyor doirasida elektr energiyasi isteʼmol qilgan. Shuningdek, 20 foiz isteʼmolchilar 1000 kVt/soatgacha, 7 foizi esa 10000 kVt/soatgacha sarf qilgan.
Oʻzbekistonda 2024-yilning 1-mayidan boshlab elektr energiyasi uchun 200 kVt/soatlik oylik isteʼmol meʼyori joriy qilingan edi. Soʻnggi vaqtlarda ijtimoiy tarmoqlarda mazkur tartibni bekor qilish boʻyicha talablar koʻpaydi. Energetika vazirligi bunga munosabat bildirdi.
Maʼlum qilinishicha, 2024-yilda respublika aholisi tomonidan jami 21,2 mlrd kVt/soat elektr energiyasi isteʼmol qilinishi rejalashtirilgan. Shundan, yil davomida oʻrtacha oylik isteʼmoli 200 kVt·soatgacha boʻlgan isteʼmolchilar jami abonentlarning 60 foizini tashkil etadi.
Yuqoridagilardan kelib chiqqan holda, vazirlik elektr energiyasi isteʼmoli yil davomida keskin oʻzgarmaydi, deb hisoblangani va butun isteʼmol yili uchun bir xil bazaviy meʼyorni joriy qilinganini bildirdi.
Aholiga yetkazib berilayotgan bir kVt/soat elektr energiyasining tannarxi 895 soʻmni tashkil etgani holda, bazaviy meʼyor doirasida aholiga 552,4 soʻmdan yetkazib berilayotgani, 201 kVt/soatdan 1000 kVt/soatgacha esa 102,1 soʻm davlat tomonidan har bir isteʼmolchi uchun qoplab berilayotgani taʼkidlangan.
Tahlillarga koʻra, 2024-yil iyun oyida barcha isteʼmolchilarning 71 foizi bazaviy meʼyor doirasida elektr energiyasini sarf qilgan va bu umumiy isteʼmolning 40 foizini tashkil etgan. 22 foiz isteʼmolchi 1000 kVt/soatgacha elektr energiyasi ishlatgan va 900 soʻmdan haq toʻlagan. Qolgan 7 foiz aholi esa 1000 kVt/soatdan 10000 kVt/soatgacha elektr energiyasini isteʼmol qilib, 1350 soʻmdan toʻlovni amalga oshirgan.
Vazirlik elektr hisoblagichlari elektr energiyasini ortiqcha hisoblayotgani yuzasidan bildirilgan murojaatlarga ham munosabat bildirib, muammolar joyiga chiqqan holda oʻrganilib, bartaraf etilayotganini bildirdi.
Shuningdek, elektr energiyasiga oshib boruvchi tariflar joriy qilinishi natijasida tizimga yuklamalar qisqarib, uzilish va avariyalar soni kamayib borayotgani aytilgan. Masalan, 2023-yilning iyun-iyul oylari davomida 210 million kVt/soat majburiy cheklov (iyun – 35 million kVt/soat, iyul – 175 million kVt/soat) kiritilgan. 2024-yilning yilning iyun oyi va iyul oyining shu kuniga qadar esa isteʼmolchilarga “barqaror ravishda”, “cheklovlarsiz” (avariyaviy holatlar va dasturlar asosidagi rejali taʼmirlash ishlaridan tashqari) elektr energiyasi yetkazib berilayotgani taʼkidlangan.
