Elektron va qog’ozdagi cheklarning summalarini tahrirlashga ruxsat berildi
Summasi tahrirlangan cheklar hududiy soliq boshqarmalari ishchi guruhi tomonidan qabul qilinadi yoki rad etiladi. Tadbirkorlarning chek tahrirlanishi natijasida yuzaga keladigan oqibatlarni oʻz zimmasiga olishi haqidagi murojaati ilova qilinadi.
Soliq qo’mitasi 2023-yil 1-yanvardan 2024-yil 30-iyungacha “Soliqchi-koʻmakchi” tamoyili asosida onlayn-NKT va elektron cheklar summalarini hamda yana bir necha ma’lumotlarni muddatsiz tahrirlashga ruxsat berdi.
Chekdagi summa quyidagicha jarayonlar orqali tahrirlanadi:
- my3.soliq.uz dagi «Yuridik shaxslarning onlayn nazorat kassa texnikasi maʼlumotlari» sahifasidan «Chek maʼlumotlari» boʻlimiga kiriladi;
- Qidiruv tizimiga chekning fiskal moduli (ID), sanasi yoki raqamini kiritib tuzatiladigan chek topiladi;
- Ochilgan oynada chek summasi tahrirlanadi.
Chek summasi oʻzgartirilgandan soʻng, tadbirkorning tahrirlash natijasida yuzaga keladigan oqibatlarni oʻz zimmasiga olishi haqidagi murojaati ilova qilinishi lozim ekani ta’kidlandi.
Qo’mita xabariga ko’ra, summasi tahrirlangan cheklar hududiy soliq boshqarmalari ishchi guruhi tomonidan qabul qilinadi yoki rad etiladi. Chek tahrirlash rad etiladigan bo’lsa, berilgan izohga asosan tuzatishlar kiritilib, qayta murojaat yuborish imkoniyati ham mavjud.
Murojaatlar 10–25-iyul kunlari qabul qilinadi. Soliq qo’mitasi soʻnggi kunga qadar qoldirmaslikni tavsiya qilgan.
Keshbek olingan cheklar boʻyicha summa byudjetga qoplab berilgan taqdirda tahrirlash imkoniyati yaratilgan.
Tahrirlangan cheklar boʻyicha tegishli hisobotlarni qayta topshirish talab etiladi. Qayta hisobot taqdim etmaslik tavofutlarni keltirib chiqarishi qayd etilgan.
Bundan tashqari, soliq to‘lovchilar 2023-yil 1-yanvardan boshlab berilgan onlayn-NKT va elektron cheklarda summadan tashqari quyidagi maʼlumotlarni «my3.soliq.uz»da xuddi o’sha boʻlimida muddatsiz tahrirlashi mumkinligi xabar qilindi:
- Qo‘shilgan qiymat solig‘i (QQS) summasi va stavkasini (0/12 foiz)
- Mahsulot va xizmatlar identifikatsiya kodini (MXIK)
- Komitent STIRini;
- mahsulot miqdorini;
- o‘lchov birligini;
- to‘lov turini (naqd pul yoki bank karta).|
Eslatib o’tamiz, bundan avval onlayn-NKT va elektron cheklarda summani oylik hisobot topshirgunga qadar o’zgartirish mumkin bo’lgan va hisobot topshirilgandan keyin summani o’zgartirish imkoniyati mavjud bo’lmagan.
