Hukumatning “Tabiiy gaz resurslaridan oqilona foydalanish chora-tadbirlari toʻgʻrisida”gi qarori qabul qilindi. Qaror bilan, mamlakatdagi “gaz zapravka”lar uchun qoʻshimcha talablar belgilandi.

Hujjat tabiiy gaz resurslaridan oqilona foydalanish hamda siqilgan gazni avtomobillarga gaz toʻldirish kompressor shoxobchalari orqali (AGTKSH) sotishni toʻliq raqamlashtirgan holda ulardan noqonuniy foydalanish va baxtsiz hodisalarning oldini olish chora-tadbirlarini nazarda tutadi.

Qayd etilishicha, 2024-yil 1-sentyabrdan neft, gaz (shu jumladan, siqilgan tabiiy va suyultirilgan uglevodorod gazi) va gaz kondensatini qazib olish va qayta ishlash uchun litsenziya olishda koʻrsatiladigan texnologik jarayonlar va texnologik uskunalarning holati texnik jihatdan tartibga solinadi.

Yangi AGTKSHlar qurish uchun tabiiy gaz tarmoqlariga ulanish boʻyicha texnik shartlar va litsenziya faqat Vazirlar Mahkamasi bilan kelishilgan holda Energetika vazirligining taqdimnomasiga koʻra beriladi.

Litsenziya olish uchun quyidagi qoʻshimcha hujjatlar taqdim etilishi koʻzda tutilgan:

• AGTKSH orqali sotiladigan siqilgan gaz sarfi hisobini bevosita gaz tarqatish ustunlaridagi maʼlumotlarni real vaqt rejimida yuritish imkonini beruvchi Davlat axborot tizimlarini yaratish va qoʻllab-quvvatlash boʻyicha yagona integrator “Uzinfocom” MCHJ tomonidan ishlab chiqilgan tizim oʻrnatilganini tasdiqlovchi hujjat;
• Energetika vazirligining AGTKSH orqali siqilgan gaz sotish boʻyicha yangi litsenziya olish Vazirlar Mahkamasi bilan kelishuvini tasdiqlovchi taqdimnomasi.

2025-yil 1-yanvardan boshlab amaldagi litsenziatlar uchun Uzinfocom avtomatlashtirilgan tizimlariga ulanish talabi majburiy hisoblanadi.

Hujjat 2024-yil 11-iyuldan kuchga kirgan.