Prezident Shavkat Mirziyoyev 1-oktyabr – Oʻqituvchi va murabbiylar kuni munosabati bilan bir guruh taʼlim sohasi xodimlari bilan uchrashdi. Uchrashuvda oʻqituvchilar uchun bir qator yangiliklar, xususan, ularning maoshi, ustama va mukofotlar haqida ham soʻz bordi.

Jumladan, endilikda har yili Oʻzbekistondagi barcha 208 ta tuman va shaharda “Yil oʻqituvchisi” tanlovi oʻtkaziladi. Gʻoliblarga esa 3 xonali uy beriladi.

Bundan tashqari, soʻnggi yillarda oʻqituvchilarga beriladigan ustamalar soni 3 tadan 17 taga oshirilgani, hozirgi paytda 6 ming oʻqituvchi 10 million soʻmdan ziyod maosh olgani taʼkidlandi. 2020-yilda bunday oʻqituvchilar soni 102 nafarni tashkil etgani urgʻulandi.

Shuningdek, maʼlum qilinishicha, kelgusi oʻquv yilidan boshlab oʻqituvchilarga xalqaro standartlar asosida malaka sertifikatlarini berish boshlanadi. Sinovlarda 86 va undan yuqori ball olganlarga qoʻshimcha 70 foiz ustama beriladi.