Vazirlar Mahkamasining qarori bilan, kirish turizmi bilan shug‘ullanuvchi turoperatorlar uchun imtiyozli kreditlar ajratishning qo‘shimcha shartlari tasdiqlandi.

Unga ko‘ra, banklar turoperatorlarga xorijlik sayyohlarni jalb etish bilan bog‘liq xarajatlarni qoplash uchun 10 yil davomida 2 yillik imtiyozli davr bilan kredit ajratadi.

Kredit liniyasi davomida bir kompaniya 25 mlrd so‘mgacha mablag‘ olishi mumkin. Kredit olish uchun ariza bergan kopmaniya bungacha kamida 1 yil ishlagan bo‘lishi va loyihani moliyalashtirish mablag‘larining kamida 15 foizini o‘z mablag‘i hisobidan ta’minlashi kerak.

Kredit oluvchiga yil davomida uning xizmatidan foydalanuvchi xorijlik sayyohlar soni va turizm xizmatidan keladigan daromadini 25 foizga oshirish majburiyati yuklatiladi. Aks holda, kredit imtiyoz bilan emas, tijorat stavkasi bo‘yicha to‘lanadi.

Kredit mablag‘laridan quyidagi maqsadlarda foydalanishga yo‘l qo‘yilmaydi:

• ilgari olingan kreditlar yoki boshqa qarzlarni qaytarish;
• alkogol va tamaki mahsulotlarini ishlab chiqarish;
• ishlab chiqarish maqsadlari uchun ishlatilmaydigan shaxsiy mol-mulk sotib olish;
• avtotransport vositalarini xarid qilish (qiymati kredit summasining 40 foizigacha bo‘lgan 8 va undan ortiq o‘rinli yo‘lovchi tashuvchi avtomobillar sotib olish bundan mustasno);
• ma’muriy xarajatlarni to‘lash, shu jumladan xizmat avtomobillarini saqlash;
• bino va inshootlar sotib olish va qurish.