AQSH O‘zbekistonning JSTga a’zo bo‘lishini qo‘llab-quvvatlaydi
Prezidentning JST masalalari bo‘yicha maxsus vakili Azizbek O‘runov AQSh bilan JSTga a’zo bo’lish bo‘yicha 14 oy davom etgan muzokaralar muvaffaqiyatli yakunlanganini ma’lum qildi. AQSh O’zbekistonning tashkilotga qo’shilishini qo‘llab-quvvatlagan 21-davlat bo‘ldi.
O‘zbekiston AQSh bilan Jahon savdo tashkilotiga (JST) a’zo bo‘lish bo‘yicha ikki tomonlama muzokaralarni muvaffaqiyatli yakunladi. Bu haqda Prezidentning JST masalalari bo‘yicha maxsus vakili Azizbek O‘runov ma’lum qildi.
Qayd etilishicha, ushbu jarayon 14 oy davom etgan. Azizbek O‘runov, shuningdek, bu yo‘lning oson bo‘lmagani va undagi tajribalar umr bo‘yi yodda qolishini ta’kidladi.
«14 oylik faol muzokaralar o‘z tugash nuqtasiga yetdi. Bu jarayon juda murakkab va mazmunli bo‘lib, u umr bo‘yi yodda qoladigan tajriba bo‘ldi. Bularning barchasi davlatimiz rahbarining tashkilotga qo‘shilish borasidagi ko‘rsatmalari va qo‘llab-quvvatlashlari, shuningdek, Prezidentimiz yordamchilarining islohotlarni faol davom ettirishdagi sa’y-harakatlaridir», — deya qo‘shimcha qildi u.
Prezidentning maxsus vakili, shuningdek, O‘zbekistonning Vashingtondagi elchisi Furqat Sidiqov va diplomatik missiya huzuridagi savdo maslahatchisi Oqil Ubaydullayevga minnatdorchilik bildirdi. .
Ma’lumot uchun, 2024-yilning sentyabr oyida O‘zbekiston 18 ta davlat bilan JSTga a’zo bo‘lish bo‘yicha muzokaralarni muvaffaqiyatli yakunlagan edi. Braziliya va Shri-Lanka bilan esa muzokaralarni yakunlash to‘g‘risida bayonnomalar imzolangan. Qo‘shma Shtatlar O‘zbekiston bilan JSTga a’zo bo‘lish bo‘yicha muzokaralarni yakunlagan 21-davlat bo‘ldi.
Eslatib o‘tamiz, avvalroq bosh vazir o‘rinbosari Jamshid Xodjaev O‘zbekiston 2026-yilda Kamerunda bo‘lib o‘tadigan 14-vazirlar konferentsiyasigacha JSTga qo‘shilish niyatida ekanligini ma’lum qilgandi.
