Iqtisodiy tadqiqotlar va islohotlar markazi (CERR) tomonidan olib borilgan tahlillar natijasida,noyabr oyida bozorda ijobiy tendensiyalar kuzatilgani aniqlandi. Savdolar 21,9 ming shartnomani tashkil etib, bu ko‘rsatkich oktyabr oyiga nisbatan 2,5 foizga oshgan. Shuningdek, yillik hisobda bozordagi faollik 0,8 foizga o‘sgan.

Hududiy dinamikaga ko‘ra, noyabr oyida Xorazm viloyatida 15,6 foiz va Buxoro viloyatida 8,4 foiz ko‘chmas mulk shartnomalari o‘sishi qayd etildi. Toshkent shahri mamlakat ko‘chmas mulk bozorining 30 foizdan ortig‘ini egallab, faollik darajasi 9,3 foizga ko‘tarildi.

Ikkilamchi uy-joy narxlariga kelsak, respublikadagi o‘rtacha narxlar 0,3 foizga oshgan bo‘lsa-da, o‘tgan yilga nisbatan 6,2 foizga ko‘tarilgan. Surxondaryo viloyatida 18,1 foiz, Buxoro viloyatida 11,9 foiz va Qashqadaryo viloyatida 10,2 foiz sezilarli o‘sish kuzatildi. Toshkentda esa ikkilamchi uy-joy narxi 0,2 foizga oshib, o‘rtacha 1,1 ming dollarni tashkil etdi.

Qoraqalpog‘istonda eng maqbul narxlar saqlanib qolgan bo‘lib, kvadrat metr uchun o‘rtacha narx 333 dollarni tashkil etdi. Shu bilan birga, Toshkentning Bektemir, Yashnobod va Shayxontohur tumanlarida narxlar sezilarli darajada oshganligi qayd etildi.

Ijara bozori holatiga kelsak, Toshkentda ijara narxlari 8,3 dollarga yetib, bu joriy yilning iyun oyi ko‘rsatkichiga teng bo‘ldi. Toshkentning Mirobod, Shayxontohur va Yakkasaroy tumanlarida ijara narxi 10-11 dollar atrofida bo‘lib, yuqori darajada saqlanib qolmoqda. Biroq, o‘tgan yilga nisbatan ijara narxlari 10,7 foizga pasaygan. Ijara narxlarining eng katta pasayishi Uchtepa tumanida 14,5 foiz, Yashnobod tumanida 14,3 foiz va Yunusobod tumanida 13,8 foiz darajasida kuzatildi.