Ўзбекистонда 2024 йилда кўчмас мулк бўйича тузилган битимлар сони бироз камайди. Бу ҳақда Марказий банкнинг Иқтисодий тараққиёт ва камбағалликни қисқартириш департаменти томонидан ўтган йилнинг тўртинчи чораги якунлари бўйича кўчмас мулк бозори таҳлилида келтирилган.

Қайд этилишича, аксарият ҳудудларда фаоллик ё пасайган ёки аввалги йиллар даражасида сақланиб қолган. Натижада кўчмас мулкка бўлган талаб барқарорлашди ва уй-жой нархлари анча мўътадил суръатларда ўсган.

Октабр-декабрь ойларида бозор фаоллиги бироз тезлашиб, учинчи чоракдаги ўртача ўсиш давом этган. Масалан, тўртинчи чорак якунларига кўра, кўчмас мулк билан боғлиқ битимлар сони 81,8 мингтани (+5,6 фоиз) ташкил этган. Бироқ ўтган йили тузилган олди-сотди битимлари сони 2,2 фоизга — 329 минг донага камайган.

Навоий, Тошкент, Бухоро, Наманган вилоятлари ва Тошкент шаҳрида битимлар сонининг пасайиши давом этган. Сирдарё, Фарғона, Қашқадарё вилоятларида фаоллик деярли 2023 йилдаги даражада сақланиб қолган. Бошқа ҳудудларда эса бироз ўсиш кузатилган.

Тўртинчи чоракда кўчмас мулк билан тузилган шартномалар сонининг ойлик динамикасида ижобий ўсиш суръатларига ўтиш кузатилган.

Кўчмас мулк бозорида талаб ва фаолликни қўллаб-қувватловчи асосий ижтимоий-демографик ва иқтисодий омиллар сақланиб қолганига қарамай, ўтган йили ипотека кредитлари ўсишининг нисбатан паст суръатлари, уй-жой қурилиши ва фойдаланишга топширишнинг нисбатан юқори ўсиши ҳамда талабнинг бироз тўйиниши кўчмас мулк нархларининг шаклланишида устунлик қилди ва уй-жой нархининг ўсиш динамикасига пасайтирувчи ҳисса қўшди, — дея хулоса қилган Марказий банк таҳлилчилари.