2025 йил январь ойида Ўзбекистоннинг ташқи савдо айланмаси (ТСА) 4,5 миллиард долларни ташкил этди ва 2024 йилнинг январь ойига нисбатан 297,2 миллион долларга ёки 7,1 фоизга ўсди.

ТСАда экспорт ҳажми 1,3 миллиард долларни (2024 йилнинг январь ойига нисбатан 14,1 фоизга ўсган) ва импорт ҳажми 3,2 миллиард долларни (ўсиш 4,4 фоиз) ташкил этган.

Ҳисобот даврида -1,9 миллиард доллар қийматида манфий ташқи савдо баланси қайд этилган.

Ташқи савдо айланмаси бўйича 20 та йирик ҳамкор давлатлар орасида 3 та мамлакат — Афғонистон, Қирғизистон ва Тожикистон билан фаолл ташқи савдо баланси кузатилмоқда, қолган 17 та давлат билан ташқи савдо балансининг салбий сальдоси сақланиб қолмоқда.

Ўзбекистон Республикаси жаҳоннинг 154 та мамлакати билан савдо алоқаларини амалга ошириб келмоқда. ТСАнинг нисбатан салмоқли ҳиссаси ХХРда (22,1 фоиз), Россияда (17,7 фоиз), Қозоғистонда (7,0 фоиз), Туркияда (4,7 фоиз) ва Германияда (3,8 фоиз) қайд этилган.

Давлатлар гуруҳи бўйича ташқи савдонинг энг катта ҳажми МДҲ мамлакатларига — 1,6 миллиард доллар, ЕОИИ мамлакатларига — 1,2 миллиард доллар, бошқа давлатлар билан товар айирбошлаш — 2,9 миллиард долларни ва Европа Иттифоқи мамлакатлари билан — 0,6 миллиард долларни ташкил этди.

Ўзбекистон ташқи савдо айланмаси таркибида энг юқори улуши Тошкент шаҳрига тўғри келди — 41,7 фоиз улуш билан 1,9 миллиард долларни, энг қуйи улуш эса Сирдарё вилоятига тўғри келди — 1,2 фоиз улуш билан 52,1 миллион долларни ташкил этди.