Омонатлар шартларининг ўзгариши ҳақида Ўзмиллийбанк, Агробанк, Асакабанк, Ипотека-банк, Микрокредитбанк, Капиталбанк ва TBC Bank расман маълум қилди. Қайд этилишича, февраль ойидан бери максимал фоиз ставкаси уч фоиз пунктга пасайган. Ўшанда Anorbank ва TBC банклари тўлдириш имкониятисиз йиллик 26 фоизли омонатларни таклиф этган эди. Янада мослашувчан шартли депозитларни — тўлдириш ва қисман ечиб олиш имконияти билан — 25 фоиз ставка бўйича очиш мумкин эди.

Ҳозир ставкалар 20−23 фоиз оралиғида ўзгариб туради. Энг юқори — 23 фоиз ставкани Anorbank, Даврбанк, Янги банк, Тенге Банк ваTBC Bank таклиф қилмоқда

Одатда, юқори фоиз ставкаларига эга бўлган омонатлар қатъийроқ шартлар билан бирга келади. Аксарият банклар бундай омонатларни тўлдириш имкониятини тақдим этмайди, аммо баъзида банклар бунга дастлабки бир неча ой ичида рухсат беради ёки минимал тўлдириш миқдорларини белгилайди.

Ҳозирда фоиз ставкалари пасайганидан сўнг, банклар энг даромадли омонатлар бўйича ҳам маблағни тўлдириш ва қисман ечиб олиш имконияти билан мослашувчан сақлаш шартларини таклиф этмоқда.

Омонат очиш учун талаб қилинадиган энг кам сумма 100 минг сўмдан бошланади. Омонат очишнинг минимал миқдори аксарият банкларда 1 млн сўмни ташкил этади. Бироқ, Туронбанкда бу кўрсаткич анча юқори бўлиб, 300 млн сўмни ташкил қилади.

Омонат муддатидан олдин ёпилганда, фоиз ставкаси маблағнинг ҳисобварақда сақланиш муддатига қараб пасайтирилади. Ортиқча тўланган фоизлар омонатнинг асосий суммасидан чегириб қолинади.