Жорий йилнинг март ойида Хитойнинг Leapmotor товар белгили C16 автотранспорт воситасида аниқланган номувофиқликлар сабабли, уларни сертификатлашга аризалар қабул қилиш юзага келган вазият бартараф қилингунга қадар вақтинча тўхтатилган эди.

Мазкур масала юзасидан Хитойнинг Zhejiang Leapmotor Technology Co. компаниясига «Ўзбекистон илмий-синов ва сифат назорати маркази» давлат муассасаси томонидан мурожаат билан чиқилган ва унинг натижасида жорий йилнинг 7 апрелида Гу Живен бошчилигидаги компания вакилларидан иборат делегация аъзолари «ЎзТест»га ташриф буюрган ҳамда вужудга келган вазият компания масъуллари билан муҳокама қилинганди.

Натижада, компания томонидан Leapmotor товар белгили C16 русумли иккита автотранспорт воситаси Ўзбекистонга импорт қилинди ҳамда жорий йилнинг 14 апрель куни марказнинг Пискент туманида жойлашган «Электромагнит мослашувчанлик синов лабораторияси»да компания мутахассислари ҳамда оммавий ахборот воситалари иштирокида БМТнинг 10-сон қоидаларида белгиланган тартибда қайта синовлардан ўтказилди.

Ўтказилган такрорий синовлар якунида компания томонидан импорт қилинган Leapmotor товар белгили C16 русумли автотранспорт воситаси БМТнинг 10-сон қоидаси талабларига мувофиқ топилди ҳамда Leapmotor компаниясига шартли равишда мазкур товар белгили автотранспорт воситаларини республикада муомалага чиқарилишига рухсат берилди.

Мазкур шартлар:

• Leapmotor товар белгили автотранспорт воситасининг номувофиқлиги аниқланганда уларни бартараф қилувчи ҳамда истеъмолчига етказилган зарарни қопловчи ишлаб чиқарувчининг расмий вакили — Ўзбекистонда резидент ҳисобланган юридик шахсни белгилаш;
• Республикага импорт қилинаётган Leapmotor товар белгили барча автотранспорт воситаларининг турини маъқуллаш учун зарур бўлган тегишли ҳужжатларни тақдим қилиш (Маълумот учун: турини маъқуллаш ҳужжати – автотранспорт воситаларининг мувофиқлигини баҳолашнинг ижобий натижалари асосида белгиланган тартибда расмийлаштирилган, бир турга кирувчи транспорт воситаларининг техник Регламент талабларига мувофиқлигини тасдиқловчи ҳужжат);
• Leapmotor товар белгили автотранспорт воситалари ишлаб чиқарилаётган корхоналарда ишлаб чиқариш жараёнлари ва шартларини ўрганиш ва баҳолаш мажбуриятларини ҳам ўз зиммасига олди.