Март ойида Ўзбекистон иш берувчилари энг кўп савдо, маркетинг ва реклама соҳаси ходимларини излашган. Бу ҳақда жойлаштирилган бўш иш ўринлари тадқиқотига асосланиб, HeadHunter маълум қилди.

Иш таклифларининг 17 фоиздан ортиғи савдо ва мижозларга хизмат кўрсатиш соҳасига тўғри келган бўлиб, бунда ўртача иш ҳақи 6,06 млн сўмни ташкил этган. Яна 11,9 фоизини 6,7 млн сўм маош билан маркетинг, реклама ва жамоатчилик билан алоқалар соҳасидаги иш ўринлари эгаллаган.

Талаб бўйича учликни гўзаллик, фитнес ва спорт соҳаси якунлайди — тахминан 9 фоиз. Бу соҳадаги номзодларга ойига ўртача 6,44 миллион сўм таклиф этилмоқда.

Энг юқори 10 талик ичидаги энг катта иш ҳақи таклифи автомобиль бизнесига тегишли бўлди — 7,11 млн сўм ва бўш иш ўринларининг 7,1 фоизи. Даромадлар бўйича иккинчи ўринни 7 млн сўм билан молия ва бухгалтерия соҳаси эгаллади, унга иш ўринларининг қарийб 4 фоизи тўғри келди.

Уй ходимлари ва хизмат кўрсатувчи ходимларнинг (бўш иш ўринларининг 5,1 фоизи) иш ҳақи энг паст бўлиб қолмоқда — 4,47 млн сўм. Шунингдек, умумий овқатланиш ва меҳмондўстлик соҳасидаги таклифлар ҳам нисбатан пастлигича қолмоқда (5,2 фоиз) — 4,66 млн сўм.

Маъмурий ходимлар (4,95 млн сўм) ва чакана савдода (5,11 млн сўм) таклиф қилинган маошлар бироз юқорироқ бўлди. Бундан ҳам юқори даромадлар қурилиш соҳасида таклиф қилинган (6 млн сўм).