Транспорт вазири Илҳом Маҳкамовнинг қайд этишича, янги аэропорт ҳозирги аэропортдан 17 км узоқликда — Тошкент шаҳридан жанубда жойлашади. У Самарқанд билан боғловчи амалдаги автомобиль йўли ва яқин келажакда қуриладиган пулли трассага яқин жойда жойлашади.

Uzbekistan Airports компанияси раҳбари Жавлонбек Умархўжаевнинг айтишича, ҳозирги Тошкент халқаро аэропорти йилига 11 млн йўловчига хизмат кўрсатиш қувватига эга. 2030 йилгача аэропорт кенгайтирилса ҳам, кўпи билан 14 млн кишига хизмат кўрсата олади. 2030 йилдан сўнг йўловчилар сони 15 млн нафардан ошиши кутилмоқда. Аэропорт атрофидаги инфратузилма ҳам бу юкламаларга дош беролмаяпти. Иккита учиш-қўниш йўлаги бор, қолаверса, марказда жойлашгани боис самолётларнинг манёвр имкониятлари чекланган.

Янги аэропорт биринчи босқичда йилига 20 млн йўловчига хизмат кўрсата олади. 169 та самолётни бир вақтнинг ўзида жойлаштириш имкони бўлади. Бир соатда камида 40 дан ортиқ парвозга хизмат кўрсатилади. Терминал биносидан самолётга тўғридан-тўғри ўтиш имконини берадиган кўприклар сони аввалида 14 та бўлади, лойиҳа якунида эса 45 тага етказилади. Яъни, асосий хизматлар терминалнинг ўзида амалга оширилади.

Лойиҳа давлат-хусусий шериклик асосида амалга оширилади. Лойиҳа қиймати ва хусусий шериклар ҳақида ҳозирча маълумот мавжуд эмас.